Өмнөд Солонгост намрын навчис харах аялал хийхээр төлөвлөж буй хүмүүс энэ жил хугацаагаа бага зэрэг хойшлуулах шаардлага тулгарчээ. Солонгосын Ойн албаны мэдээлснээр намрын өнгө хувирал төвийн бүсээс өмнөд нутаг руу аажмаар тархаж, 10-р сарын 20-нд Сорак уулнаас эхлэх төлөвтэй байна. Навчисын оргил үе Сонни ууланд 10-р сарын 28-нд, Наэжан ууланд 11-р сарын 4-нд, Халла ууланд 11-р сарын 6-нд ажиглагдах бөгөөд улсын хэмжээнд агч мод, царсны навч шарлах дундаж хугацаа 10-р сарын 31-нд тохиож, сүүлийн таван жилийн дунджаас 0.8 хоногоор хойшилжээ.
Намрын улирал ийнхүү хойшилсон нь зөвхөн энэ жилийн тохиолдол биш юм. Агаарын температур өсөхийн хэрээр хавар эрт ирж, намар хожимдож буйг эрдэмтэд тогтоов. БНСУ-ын Үндэсний ботаникийн хүрээлэн болон Сөүлийн Үндэсний их сургуулийн хамтарсан 2021 оны судалгаагаар өнгөрсөн арван жилд өргөн навчит моддын нахиалах хугацаа 13 хоногоор урагшилж, намрын навчис шарлах үе 3.7 хоногоор хойшилсон байна. Тухайлбал, хаврын дундаж температур Цельсийн нэг хэмээр нэмэгдэхэд навч нахиалах хугацаа 3.6 хоногоор түргэсдэг бол намрын дундаж температур нэг хэмээр өсөхөд навчис шарлах нь 1.5 хоногоор саатдаг болохыг тооцоолжээ.
Ажиглалтын урт хугацааны дүн ч байдлыг улам тодорхой харууллаа. 'Atmosphere' сэтгүүлд нийтлэгдсэн судалгаанаас үзэхэд 2009-2024 оны хооронд тус улсын навчит моддын нахиа задрах хугацаа жил бүр 0.94 хоногоор, цэцэглэлт 0.83 хоногоор, навч дэлгэрэлт 0.79 хоногоор наашилсан байна. Ийнхүү 16 жилийн хугацаанд ургамал хавар дэлгэрэх хугацаа 13-15 хоногоор урагшилсан бол навчис 90-100 хувь шарлах оргил үе жил тутамд 0.33 хоногоор хойшлогдож, нийт таван өдрөөр саатжээ. Үүний үр дүнд моддын ногоорох буюу ургалтын хугацаа дунджаар 17 гаруй өдрөөр уртассаныг судлаачид тэмдэглэв.
Ургалтын хугацаа уртассанаар моддод фотосинтез явуулж, нүүрстөрөгч шингээх боломж нэмэгдэх мэт боловч энэ нь ой модны экологийн тэнцвэрт таатай нөлөө үзүүлдэг гэж шууд дүгнэж болохгүй юм. Хөрс нь их хэмжээний нүүрстөрөгчийг хадгалдаг бөгөөд агаарын температур нэмэгдэх нь хөрсний бичил биетүүдийн идэвхийг өдөөж, нүүрстөрөгчийн давхар ислийн ялгаруулалтыг нэмэгдүүлдэг талтай. Мөн ургамлын шингээлт нь ган гачиг, цаг агаарын эрс тэс уур амьсгал, чийгшил зэргээс шууд хамаардаг болохыг Канвон Үндэсний их сургуулийн профессор Но Нам Жин тайлбарлалаа.
Түүнчлэн ойн дотоод экосистемд нарийн төвөгтэй өөрчлөлтүүд гарч байна. Хавар том моддын навч хэт эрт нахиалж өтгөрөхөд газрын хөрсөөр ургадаг жижиг ургамлууд нарны гэрэл дутагдсаны улмаас үр жимсээ боловсруулж амжилгүй хоцордог болжээ. Үүнээс гадна намар хойшлох нь модод өвлийн хүйтэнд бэлтгэх хугацааг багасгаж, хүйтэн тэсвэрлэх чадварыг нь сулруулдаг болохыг Чоннам Үндэсний их сургуулийн профессор Ким Хён Жун онцлов. Уур амьсгалын хурдацтай өөрчлөлтийг судалгаагаар гүйцэж амжихад бэрхшээл тулгарч байгаа тул бүс нутаг болон модны төрөл бүрээр нь хяналт тавьж, ой модыг удирдах урт хугацааны арга хэмжээ авах шаардлага тулгарчээ.
