АНУ-ын Ерөнхийлөгч Дональд Трамп хиймэл дагуулын сүлжээний хязгаарлалтыг Илон Маск цуцалсан гэж мэдэгдсэн хэдий ч Украинд Starlink сүлжээ доголдолтой хэвээр байна. Украины Батлан хамгаалах яамны эх сурвалж БиБиСи агентлагт өгсөн мэдээлэлдээ цагт 161 км хүртэл хурдалсан нисэгчгүй төхөөрөмжүүдийн холбоо тасарч байгааг онцолжээ.
Украины зэвсэгт хүчин цэргийн зориулалттай Starshield болон иргэний Starlink сүлжээний ажиллагааг тогтмол хянаж байгаа ч хязгаарлалт бүрэн цуцлагдсан гэх нотолгоо хараахан гараагүй байна. Үүнээс өмнө Дональд Трамп цэргийн тусгай сүлжээг саатуулах үүргийг технологийн тэрбумтан Илон Маскт өгөөгүй хэмээн үгүйсгэж, улмаар пүрэв гарагт уг хязгаарлалтыг буцаан сэргээсэн хэмээн мэдэгдсэн юм.
Илон Маск өөрийн зүгээс уг сүлжээний хурдыг санаатайгаар бууруулаагүй бөгөөд уг цэргийн системийг Пентагон хянадаг учир асуудлын цаана АНУ-ын Батлан хамгаалах яам байж болзошгүйг дурджээ. Цагаан ордон Украины холбооны сүлжээнд зориудаар хязгаарлалт тавьсан гэх мэдээллийг эрс няцаасан бол Трамп энэ асуудлаар Илон Масктай утсаар ярьсан эсэхээ тодорхой хариулахаас татгалзав.
Дайны талбарт холбоо тогтооход ашигладаг уг систем нь дэлхийн нам дор тойрог зам дахь 10,000 орчим хиймэл дагуулд тулгуурлан алслагдсан бүсүүдийг тасралтгүй интернетээр хангадаг билээ. Украины цэрэг тусгай сүлжээний тусламжтайгаар байг бодит цагийн горимд хянаж, дайсны нисгэгчгүй төхөөрөмжийг устгах ажиллагааг амжилттай удирддаг байна.
Украины нэгэн дайчин БиБиСи-д өгсөн ярилцлагадаа энэхүү сүлжээг бүрэн хаавал сүйрэл болно гээд өнгөрсөн долоо хоногт цагт 50 миль буюу 80 км хурдтай автомашинаар зорчиход л холбоо тасарч байсныг өгүүлэв. Мөн өөр нэгэн цэрэг мэдээлэл болон тушаалыг ганц хоёрхон секундийн дотор түргэн шуурхай дамжуулах боломж дайны талбарт хамгийн том давуу тал болдог гэдгийг онцоллоо.
Сүлжээний доголдол нь Украины зүгээс Оросын газрын тосны дэд бүтцэд цохилт өгсөнтэй холбоотойгоор Дональд Трамп болон Володимир Зеленский нарын хооронд үүссэн дипломат маргааны үеэр эхэлсэн юм. Дэлхийн түлшний үнэ нэмэгдэж байгаад бухимдсан Трамп Киевийг шүүмжилж, улмаар хоёр орны удирдагчид нэг нэгнийхээ эсрэг ширүүн мэдэгдлүүд хийгээд байна.
Украины Ерөнхийлөгч Володимир Зеленский АНУ-ын Төрийн нарийн бичгийн дарга Марко Рубиотой холбогдон систем бүрэн сэргэх тухай албан ёсны мэдээллийг 48 цагийн дотор авахаар хүлээж байгаагаа мэдэгдлээ. Харин Америкийн хэвлэлүүдийн мэдээлснээр Трамп уг хязгаарлалтын талаар Маскт дургүйцлээ илэрхийлсний дараа сүлжээний ажиллагаа харьцангуй дээрдэж эхэлсэн гэв.
