Прага хотын Нийтийн тээврийн газар сурагчдын намрын амралтын хуваарьтай уялдуулан төмөр замын их засвар хийхээр төлөвлөжээ. Үүнтэй холбогдуулан Нусле, Вршовице болон Жижков дүүргээр дайран өнгөрдөг зургаан чиглэлийн трамвайн хөдөлгөөнийг өөрчилж, зарим хэсгийг түр зогсоохоор шийдвэрлэсэн тул иргэдийг зорчих чиглэлээ урьдчилан шалгахыг анхааруулав.
Хязгаарлалтын хүрээнд 10 дугаар сарын 28-ны Лхагва гаргийн өглөөний 04:30 цагаас 11 дүгээр сарын 1-ний Ням гаргийн шөнө дунд хүртэл I. P. Pavlova болон Otakarova буудлын хоорондох трамвайн хөдөлгөөнийг хоёр чиглэлд таван өдөр бүрэн хаана. Засварын хугацаанд 13 дугаар чиглэлийн трамвай огт явахгүй бол 2 болон 21 дүгээр чиглэлийг нэгтгэж, Петршинигээс Карлово намнести хүрээд цааш Сливенек рүү шууд үргэлжлүүлэн зорчихоор зохицуулжээ.
Түүнчлэн бусад чиглэлүүдийн маршрутыг түр хугацаанд тойруулан явуулахаар болсон байна. Тухайлбал, 6 дугаар трамвай Надражи Холешовицегээс гарч Карлово намнести, Альбертов, Дивадло На Фидловачке зэрэг буудлуудаар тойрон Отакарова буудалд хүрч үндсэн замдаа орох бол 11 дүгээр шугам болон шөнийн 96 дугаар чиглэлийг Намнести Миру, Чехово намнести буудлуудаар дамжуулан тойруулна. Эдгээр өөрчлөлттэй холбогдуулан өдрийн цагаар Надражи Вршовице болон Сараевска чиглэлд Х11 дугаартай нөхөн үйлчлэх автобус явуулахаар болжээ.
Үүнээс гадна Жижков дүүрэгт 10 дугаар сарын 11-нээс эхэлсэн төмөр замын тусдаа хязгаарлалт 12 дугаар сарын 18-ныг хүртэл үргэлжилж байна. Тус дүүрэг дэх Накладове надражи Жижков болон Охрада буудлын хооронд хөдөлгөөнийг түр хаасантай холбогдуулан 16 болон 34 дүгээр шугамыг түр цуцалж, зорчигчдод зориулж 30, 37 болон шөнийн 90 дүгээр түр чиглэлийн трамвай, мөн Х9, Х95, Х98 дугаартай автобусуудыг үйлчилгээнд нэмэлтээр гаргаад байна.
