Украины Ерөнхийлөгч Володимир Зеленский болон АНУ-ын Ерөнхийлөгчийн тусгай төлөөлөгч Стив Уиткофф нар Норвегийн нийслэл Осло хотод уулзахаар боллоо. Дональд Трамп болон Зеленскийн харилцаа эрс муудаж буй энэ эгзэгтэй үед уулзалтыг зохион байгуулж өгөхийг Украины тал Норвеги, Финланд улсуудаас хүсжээ. Осло хотод эхлээд Зеленский Норвегийн Ерөнхий сайд Йонас Гар Стёре, Финландын Ерөнхийлөгч Александр Стубб нартай хэлэлцээ хийсэн байна.
Энэхүү уулзалтын өмнө АНУ Киевийн талд тагнуулын мэдээлэл дамжуулахгүй удаашруулсны улмаас украинчууд амиа алдаж байна гэх буруутгалыг Төрийн нарийн бичгийн дарга Марко Рубио эрс үгүйсгэв. Тэрбээр уг асуудлыг 'хэрүүл маргаан дагуулсан, байж боломгүй зүйл' хэмээн тодорхойлсон байна. Зеленскийн цэрэг-техникийн зөвлөх Серхий Бескрестнов АНУ-аас агаарын довтолгооны сэрэмжлүүлэг цаг тухайд нь ирэхгүй байгаа тухай БиБиСи агентлагт ярьсан нь ийнхүү маргаан үүсгэсэн юм.
Сүүлийн долоо хоногуудад Вашингтон, Киевийн харилцаа ихээхэн хүйтэрч, Дональд Трамп Украиныг шинэ удирдагчтай болох цаг нь ирсэн, эсвэл өөр хүнээр хэлэлцээ хийлгэх хэрэгтэй гэж удаа дараа мэдэгдэх болсон. Ослод болох уулзалтад Стив Уиткофф биечлэн оролцох бол Трампын хүргэн Жаред Кушнер цахимаар холбогдохоор төлөвлөжээ. Норвегийн Ерөнхий сайд уг яриа хэлэлцээг хоёр талын харилцааг илүү бүтээлч зам руу чиглүүлж, шударга бөгөөд урт хугацааны энх тайванд хүрэх зорилготой хэмээн мэдэгдэв.
Украины Ерөнхийлөгч өмнө нь Рубиотой ярилцахдаа агаарын довтолгоог эрт сэрэмжлүүлэх мэдээлэл, Патриот системийн пуужин сөнөөгч болон 'SpaceX' компанийн 'Starlink' сүлжээний тогтвортой ажиллагааг хангаж өгөхийг хүссэн юм. Энэтхэгт айлчилж буй Рубио Патриот пуужингууд одоогоор Украинд очиж амжаагүй байж магадгүйг хүлээн зөвшөөрсөн ч АНУ-ын зүгээс санаатайгаар ямар нэгэн тусламжийг хориглоогүй гэж тайлбарлав. Мөн өнгөрсөн долоо хоногт АНУ-ын сенаторууд 'Starlink' сүлжээний тасалдлыг яаралтай шалгахыг шаарджээ.
Нөгөө талд Трамп саяхан Оросын Ерөнхийлөгч Владимир Путинтэй утсаар ярьсны дараа Москвагаас АНУ болон бусад зах зээлд 300,000 гаруй тонн дизель түлш нийлүүлэх болсныг зарлаж, Оросын түлшний экспортын хоригийг цуцалсан билээ. Зеленский энэхүү хэлэлцээрийг 'Путинд барьсан төрсөн өдрийн бэлэг' хэмээн шүүмжилсэн юм. Ирэх сард болох АНУ-ын завсрын сонгуулийн өмнө Трамп дотоод зах зээл дэх шатахууны үнэ дээд түвшинд хүрсэнд Украиныг Оросын газрын тос боловсруулах үйлдвэрүүдэд цохилт өгсөнтэй холбон буруутгаж байна.
Европын холбоотнууд АНУ-ын авч буй алхмуудад ихээхэн түгшиж байна. ХБНГУ-ын Канцлер Фридрих Мерц АНУ 2025 оны эхнээс хойш Украины батлан хамгаалах зардлыг гаргахаа больж, бүх ачаа Европын улсуудын төсөвт ирснийг тэмдэглэв. Түүнчлэн АНУ-ын Дэд ерөнхийлөгч Жэй Ди Вэнс Украиныг холбоотон биш зөвхөн зарим талаар хамтрагч гэж нэрлээд, НАТО-д элсүүлэхийг эсэргүүцэж, Оросын эрчим хүчний дэд бүтцэд халдахаа зогсоох ёстой гэсэн байр суурь илэрхийлжээ.
