Квийнслэнд мужийн тариалангийн бүс нутагт цаг агаар хүйтэрсний улмаас гадил жимсний ургац саатаж, Австралийн томоохон дэлгүүрүүдийн лангуу хоосорлоо. 'Коулс', 'Вүүлвортс', 'Алди' зэрэг сүлжээ супермаркетуудад уг жимс цөөн тоогоор, эсвэл хэт түүхийгээрээ худалдаанд нийлүүлэгдэж байна.
Энэхүү хомсдол нь алимны улирал өндөрлөж, зуны яст жимс зах зээлд хараахан бүрэн нийлүүлэгдээгүй эгзэгтэй цаг үетэй давхацсан юм. Австралийн 10 өрх тутмын 9 нь гадил жимсийг өдөр тутмын хэрэглээндээ тогтмол худалдан авдаг бөгөөд нийлүүлэлт буурсан ч иргэдийн эрэлт өндөр хэвээр үлджээ.
Супермаркетууд хэрэглэгчдээ алдахгүйн тулд гадил жимсний үнийг нэг килограммыг нь 5 доллароос хэтрүүлэхгүй барьж байгааг салбарынхан онцолж байна. Энэ нь эрэлтийг улам өдөөж, лангуун дээрх нөөц эрс хомсдох нөхцөлийг бүрдүүлэв. Гадил дутагдсанаас гадна цаг агаарын ер бусын халалт алимны ургацад сөргөөр нөлөөлсөн нь жимсний сонголтод хүндрэл үүсгэлээ.
АНУ зэрэг улсууд Ирантай үүссэн дайнаас үүдэлтэй тээврийн өндөр зардлаас болж гадил жимсний хомсдолд орсон бол Австрали дотоодын хэрэгцээгээ өөрсдөө хангадаг. Тариалангийн бүсэд дулаарч байгаа тул хомсдол удахгүй арилна гэж тус улсын Гадил тариалагчдын зөвлөл мэдээллээ. Иймд шинжээчид хэрэглэгчдэд нөөц нь элбэг, үнэ нь буурч буй манго болон удахгүй гарах тоорын төрлийн жимснүүдийг сонгохыг зөвлөв.
