Кенийн шүүхээс өлсгөлөнгийн шашны гаж урсгалыг толгойлогч Пол Маккензи болон түүний хамсаатан 30 орчим хүнийг 190 хүүхэд, нэг насанд хүрсэн хүний амийг бүрэлгэсэн хэрэгт гэм буруутайг тогтоолоо. Шүүгдэгч Пол Маккензи нь 'Good News International Church' нэртэй байгууллагаараа дамжуулан ертөнцийн төгсгөлөөс өмнө диваажинд очихын тулд өөрсдийгөө болон үр хүүхдээ өлсгөж үхэхийг сүсэгтнүүддээ тушаадаг байсныг прокурорууд нотолсон юм. Маккензи өлсөх тушаал өгөөгүй хэмээн мэдүүлсэн ч шүүх түүний тайлбарыг няцаав.
Момбаса хотын Дээд шүүхэд найм гаруй цаг үргэлжилсэн шүүх хурлын үеэр шүүгч Диана Каведза Мочаче хүүхдүүдийг эцэг эхийнх нь нүдэн дээр тусгаарлаж, хоол ундгүй хорьж байсан тохиолдлуудыг онцоллоо. Хэрэг хэлэлцэх танхимд шүүгдэгч эхнэрийн хамт сууж байсан бөгөөд хохирогчдын ар гэрийнхэн шийдвэрийг сонсохоор олноор цуглажээ. Тухайлбал, хоёр ач хүүхдээ оруулаад гэр бүлийн найман гишүүнээ тус гаж урсгалын улмаас алдсан Фрэнсис Ванже энэ өдрийг олон хоног сэтгэл түгшин хүлээснээ хуваалцсан байна.
Эрх баригчид Кенийн зүүн өмнөд эрэг орчмын Шакахола ойн гүехэн булшнуудаас нийт 400 гаруй цогцос олж илрүүлээд буй юм. Тэдгээр цогцос маш их муудсан байсан тул одоогоор ердөө 26 хүнийг албан ёсоор таньж тогтоосон бөгөөд даваа гарагийн шүүхийн шийдвэр нь 191 хүний үхэлд хамаарч байна. Ойд амь үрэгдсэн бусад хохирогчтой холбоотой мөрдөн шалгах ажиллагаа цаашид үргэлжлэх ажээ.
Шашны гаж бүлэглэлийн дотоод үйл ажиллагааг мэддэг хүмүүсийн мэдээлснээр, Маккензи олноор өлсгөх ажиллагааг гурван үе шаттай төлөвлөсөн байв. Эхлээд хүүхдүүдийг, дараа нь эмэгтэйчүүд болон залуусыг, хамгийн сүүлд үлдсэн эрчүүдийг өлсгөж үхүүлэх төлөвлөгөө боловсруулсан байжээ. Таксины жолооч байсан тэрээр сургууль, эмнэлгийг чөтгөрийн газар хэмээн нэрлэж, сүсэгтнүүдийнхээ хүүхдүүдийг сургуульд явуулах болон өвдсөн үедээ эмчилгээ хийлгэхийг хатуу хориглодог байсан байна.
Дагагчид нь гялгар уут, сүрлээр барьсан түр орогнох байруудад амьдардаг байсан ба Маккензи тэдгээрийг Иерусалим, Иудей зэрэг библийн нэрээр нэрлэсэн бүсүүдэд хуваажээ. Энэхүү аймшигт хэрэг 2023 оны гуравдугаар сард нэгэн иргэн ах, бэр хоёроо Маккензигийн тушаалаар хүүхдүүдээ өлсгөж хөнөөсөн талаар цагдаад мэдэгдсэнээр задарсан юм. Маккензи эхлээд батлан даалтаар суллагдсан ч 2023 оны дөрөвдүгээр сард дахин баривчлагдаж, цагдаа нар ойд нэгдсэн эрлийн ажиллагааг эхлүүлсэн түүхтэй.
Энэхүү сүйрэл нь эрх баригчдыг 2017 оноос хойш хяналтандаа байсан сэжигтний үйл ажиллагааг хэрхэн таслан зогсоож чадаагүй талаарх шүүмжлэлийг дагуулав. Кенийн Ерөнхийлөгч Уильям Руто төрийн байгууллагууд энэ хэргийг урьдчилан сэргийлэх ёстой байсныг хүлээн зөвшөөрч, хариуцлага хүлээхээ мэдэгдэж байв. Одоогоор Маккензи терроризмтой холбоотой бусад хэрэгт буруутгагдаж байгаагаас гадна хоригдож байх хугацаандаа Шакахола ойгоос 30 км зайд орших Ква Бинзаро тосгонд 52 хүний үхлийг удирдсан гэх хэрэгт тус тус яллагдаж байна.
