Японы баруун бүсийн Сайжо хотын дэд дарга баярын тэрэгний дор дарагдаж амиа алдсан нь уламжлалт баяр наадмын аюулгүй байдалд түгшүүр төрүүлэв. Өнгөрсөн бямба гарагт болсон баярын үеэр 62 настай Акихиро Набае бусад оролцогчдын хамт асар том тэрэг дамжилж яваад доор нь дарагджээ. Түүнийг эмнэлэгт яаралтай хүргэсэн боловч удалгүй нас барсан бөгөөд өөр хүн гэмтэж бэртээгүй тухай орон нутгийн хэвлэлүүд мэдээллээ.
Энэхүү харамсалтай явдал гарахаас хоёр долоо хоногийн өмнө Осака мужид болсон Данжири баярын үеэр мөн ийм осол гарчээ. Тухайн өдөр өөр өөр сууринд уламжлалт модон тэрэг хөмөрснөөр 51 болон 48 настай хоёр эрэгтэй амиа алдаж, 16 хүн бэртсэн юм. Зуу зуун эрчүүд дөрөв хүртэлх тоннын жинтэй тэргүүдийг огцом эргэлтээр хурдтай чирэх үед замаасаа гарч унасныг цагдаагийн газраас тодруулав.
Эдогийн үе буюу 1603-1868 оноос эхлэн жил бүр ургацын баяр тэмдэглэж ирсэн Сайжо хотод нийт 100 гаруй тэрэг оролцдог байна. Ослын үеэр гурав хүртэлх тоннын жинтэй 11 тэргийг зэрэгцүүлэн жагсаасан байсан бөгөөд дэд дарга тэнцвэрээ алдсан эсэх нь тодорхойгүй байгаа ажээ. Хотын дарга Мицүёши Очи уг явдалд гүнээ харамсаж, хотын шинэ удирдлагын баг хамтран ажиллах гэж байхад эмгэнэл учирсныг мэдэгдэн эмгэнэл илэрхийллээ.
Японы уламжлалт арга хэмжээнүүдийн үеэр хүмүүс осолдож бэртэх явдал сүүлийн саруудад удаа дараалан бүртгэгдэж буйг эх сурвалжууд онцолж байна. Тухайлбал, өнгөрсөн хоёрдугаар сард Окаяма хотод 10,000 орчим эрэгтэй оролцсон баярын үеэр хүмүүсийн хөлд хоёр иргэн дарагдан амиа алдсан юм.
