Франц улсад бямба гарагт өрнөсөн эсэргүүцлийн жагсаал эмх замбараагүй байдал, тонуул болон хувирснаар нийслэл Парис хотын гудамжинд шатсан автомашинууд болон хагарсан шил үлдэв. Тус улсын хэмжээнд нийт 550,000 орчим иргэн гол төлөв тайван жагссан ч хууль сахиулах байгууллагынхан 1,800 орчим хүнийг баривчилсан байна. Жагсагчид шатахууны үнийн өсөлт, амьжиргааны өртөг, сургууль зэрэг нийтийн үйлчилгээний хүртээмж муудсаныг шүүмжлэн төв талбайнуудад гарч иржээ.
Парис, Марсель, Лилль болон бусад томоохон хотуудад хар хувцас, баг өмссөн бүлэг хүмүүс автомашин, барилга байгууламжид зориуд гал тавьсан байна. Парис хотод жагсагчид эмх замбараагүй байдлыг зохицуулах цагдаа нартай мөргөлдөж, хууль сахиулагчид тэдний эсрэг нулимс асгаруулагч хий, усан буу ашиглав. Францын Дотоод хэргийн яамнаас мэдээлснээр эмх замбараагүй байдлын үеэр цагдаа, жандарм болон гал сөнөөгч нийлсэн 500 гаруй алба хаагч гэмтэж бэртсэн юм.
Үймээн самууны үеэр олон нийтийн өмч болон худалдааны төвүүд ноцтой хохирол амссан бөгөөд Худалдааны холбооноос 1,500 орчим дэлгүүр сүйдсэнийг мэдээллээ. Парис хотын төвд Ralph Lauren, Gucci, Versace зэрэг брэндийн тансаг дэлгүүрүүдийн шилэн хаалгыг цөм цохиж, бараа бүтээгдэхүүнийг нь дээрэмджээ. Мөн Лилль хотод түргэн хоолны газар, Apple компанийн дэлгүүрийг тоносон бол Марсель хотод иргэд хотын захиргааны төмөр хашааг эвдэн дотогш дайран оров.
Францын 2-р сувгийн хяналтын камерын дүрс бичлэгээс харахад баг зүүсэн өсвөр насныхан гар утасны дэлгүүрийн лангууг цөлмөж байжээ. Бямба гарагийн үймээний дараа хотын оршин суугчид хагарсан шил, нурангийг цэвэрлэж эхэлсэн бөгөөд олон дэлгүүрийн ханан дээр баячуудыг буруутгасан лоозонгууд бичигдсэн байв. Бүгд найрамдах улсын талбайн ойролцоох нэгэн хувцасны дэлгүүрийн эзэн танхайрагчид 90 орчим минутын турш дээрэм хийж, жагсаалыг далимдуулан завшсан тухай ярьжээ.
Түүнчлэн Лион хотод түүхэн ач холбогдолтой аялал жуулчлалын төвийн байрыг шатаасан нь орон нутгийн эрх баригчдыг гүн цочролд оруулсан байна. Лимож хотын 143 жилийн настай захиргааны барилга галд өртсөний улмаас ихээхэн хэсэг нь нурж, Сент-Этьен хотод нэг залуу тэсрэх бөмбөгөнд гараа алджээ. Дотоод хэргийн сайд Лоран Нуньес жагсах нь үндсэн эрх боловч хэт зүүний бүлэглэлүүд цагдаа нарыг өдөөн хатгаж, төрийн өмчийг сүйтгэсэн хэмээн мэдэгдэв.
