Вьетнам улс болон Европын чөлөөт худалдааны холбооны (EFTA) гишүүн дөрвөн орон ням гарагт Ханой хотод чөлөөт худалдааны хэлэлцээрт албан ёсоор гарын үсэг зурлаа. Тус холбоонд Норвеги, Швейцар, Исланд, Лихтенштейн гэсэн Европын Холбооны гишүүн бус дөрвөн улс багтдаг бөгөөд энэхүү тохиролцоог Вьетнам болон Норвегийн Засгийн газар олон нийтэд зарлав.
Талуудын хоорондох албан ёсны яриа хэлэлцээ анх 2012 онд эхэлсэн ч 2018 онд завсарлаж, өнгөрсөн жилээс сэргээсэн юм. Зүүн Өмнөд Азийн хамгийн хурдацтай хөгжиж буй эдийн засагтай Вьетнам болон EFTA-ийн байгуулсан энэхүү гэрээний хүрээнд аж үйлдвэр, загас, хөдөө аж ахуйн бүтээгдэхүүний импортын гаалийн татварыг чөлөөлөх буюу бууруулахаар тогтжээ.
Хэлэлцээрийн хүрээнд Норвегийн Вьетнам руу гаргаж буй нийт экспортын бараг тал хувь нь гаалийн татваргүй болох бөгөөд долоон жилийн хугацаанд энэ үзүүлэлт 98 хувьд хүрнэ гэж Норвегийн Засгийн газар мэдэгдлээ. Түүнчлэн уг баримт бичиг нь бараа, үйлчилгээний худалдаанаас гадна оюуны өмчийн эрх, худалдааны хамгаалалтын арга хэмжээ болон тогтвортой хөгжлийн асуудлыг хамарч байна.
Тус холбооны мэдээлснээр EFTA болон Вьетнамын хоорондох худалдааны нийт эргэлт өнгөрсөн онд 4.8 тэрбум евро буюу 5.4 тэрбум ам.долларт хүрчээ. Энэхүү хэлэлцээр нь дэлхийн эдийн засаг тодорхойгүй байгаа энэ үед худалдааны дүрэмд суурилсан тогтолцоог бэхжүүлж, импорт, экспортын зах зээлээ төрөлжүүлэх болон дэлхийн үнэлэмжийн сүлжээнд илүү гүнзгий нэгдэхэд чухал түлхэц болно гэдгийг Вьетнамын тал онцоллоо.
