Францын хувийн хэвшлийн ажилтнуудын нэмэлт тэтгэврийг хариуцдаг 'Agirc-Arrco' сангийн захирлуудын зөвлөл өнгөрсөн аравдугаар сарын 14-ний хуралдаанаар тэтгэврийн хэмжээг 1.4 хувиар нэмэх шийдвэр гаргалаа. Тус шийдвэр нь ирэх 11 дүгээр сарын 1-нээс эхлэн албан ёсоор хэрэгжиж, хувийн хэвшлийн ахмадуудын сар бүр авдаг нэмэлт тэтгэвэр өсөх юм.
Хувийн салбарт ажилладаг иргэд Нийгмийн даатгалын ерөнхий сангаас суурь тэтгэвэр авахаас гадна 'Agirc-Arrco' системд заавал шимтгэл төлдөг хуультай. Ажиллах хугацаандаа цуглуулсан шимтгэл нь тусгай оноонд шилжиж, улмаар тэтгэвэрт гарах үед нь сар бүр олгох нэмэлт тэтгэвэр болон бодогддог журам үйлчилдэг.
2023 оны 10 дугаар сарын 5-ны салбар хоорондын үндэсний хэлэлцээрийн дагуу 2024-2026 оны хугацаанд тус тэтгэврийг инфляцын түвшингээс 0.4 нэгжээр хассан үзүүлэлттэй уялдуулан шинэчлэх дүрмийг баталсан юм. Энэ оны хувьд тамхины үнийг тооцоогүй инфляц 2 хувь, дундаж цалингийн өсөлт 1.9 хувь байх төлөвтэй байсан тул нэмэгдлийн хэмжээг 1.2-1.9 хувийн хооронд тогтоох боломж бүрджээ.
Өнгөрсөн 2025 онд нийгмийн түншлэгч талууд тэтгэврийн өсөлтийн хэмжээн дээр санал нэгдэж чадаагүй тул хамгийн сүүлд 2024 оны 11 дүгээр сард 1.6 хувиар нэмэгдүүлж байв. Харин оноо худалдан авах үнийг ирэх 2027-2030 оны үндэсний хэлэлцээрийн үеэр дахин хэлэлцэж эцэслэн тогтоохоор төлөвлөжээ.
