Өмнөд Солонгосын цагдаагийн байгууллага Инчон хотын томоохон худалдааны цогцолборт хутгаар зэвсэглэн халдлага үйлдэж, найман хүнийг шархдуулсан сэжигтний хувийн мэдээллийг баасан гарагт нийтэд ил болгов. Тусгай хорооны хурлаар сэжигтэн нь 59 настай Чой Чүн Раг болохыг баталж, царайны зургийг нь олон нийтэд дэлгэсэн байна.
Инчоны цагдаагийн газар гэмт хэргийн хэрцгий арга барил, учруулсан хохирлын ноцтой байдал болон хэрэг үйлдсэнийг батлах хангалттай нотлох баримт бүрдсэнийг харгалзан уг шийдвэрийг санал нэгтэй гаргаснаа мэдэгдлээ. Сэжигтний хувийн мэдээллийг арваннэгдүгээр сарын 16-ныг хүртэл албан ёсны цахим хуудсанд байршуулахаар шийдвэрлэв.
Хэрэг мягмар гарагт Сөүлээс баруун тийш 30 орчим километрийн зайд орших Инчон хотод болсон бөгөөд сэжигтэн хоёр гартаа хутга барин нийт 10 хүний амь насанд халдахыг завджээ. Халдлагын улмаас найман хүн шархадсан бөгөөд зүрх нь түр зогссон нэг хохирогч одоог хүртэл ухаан ороогүй байна. Үлдсэн хоёр хүн шархдалгүй зугтаж амжжээ.
Байцаалтын явцад сэжигтэн орон нутгийн нэгэн эмнэлгийн үйлчилгээ, эмчилгээнд сэтгэл дундуур байснаа хэрэг үйлдэх шалтгаан болсон гэж мэдүүлсэн байна. Чой Чүн Раг нь урьд өмнө 10 удаа гэм буруутайд тооцсон шүүхийн шийдвэр сонсож байснаас хоёр нь хүний амь насанд хүрэхийг завдсан хэрэг байжээ.
