Өмнөд Солонгосын сайд нар Засгийн газрын хуралдааны шууд дамжуулалтаас болж Ерөнхийлөгчийн эсрэг байр суурь илэрхийлэхэд хүндрэлтэй боллоо гэж гомдол гаргасан тухай мэдээллийг Ерөнхий сайдын ажлын алба пүрэв гарагт албан ёсоор үгүйсгэлээ.
Өмнө нь 'Ханкүк Илбо' өдөр тутмын сонинд мэдээлснээр, 10 орчим сайд энэ сарын эхээр Ерөнхий сайд Хан Сон Сүгтэй хамт оройн зоог барих үеэрээ уг асуудлыг хөндсөн гэжээ. Сайд нар бодлогын эрүүл мэтгэлцээн өрнүүлэх боломжийг бүрдүүлэхийн тулд хуралдааныг шууд дамжуулахыг хязгаарлах хүсэлт гаргасан хэмээн тус сонин нийтэлсэн байна.
Харин Ерөнхий сайдын ажлын алба уг нийтлэлийг үндэслэлгүй гэж мэдэгдэв. Төрийн хэрэг хөтлөлтийг олон нийтэд ил тод байлгах, ард иргэдийн санаа бодлыг бодлогод идэвхтэй тусгах зорилгоор Засгийн газрын хуралдааныг түүхэндээ анх удаа ийнхүү шууд нэвтрүүлж байгааг тус алба онцоллоо.
Мөн Засгийн газрын гишүүд хуралдаанаар хэлэлцэж буй асуудалд үзэл бодлоо чөлөөтэй илэрхийлж байгаа бөгөөд Ерөнхийлөгч ч тэдний саналыг нээлттэй хүлээж авч байгааг албаны мэдэгдэлд тэмдэглэжээ.
