АНУ-ын Орегон мужийн Бэнд хотын 'Silver Rail' бага сургуульд пүрэв гарагийн үдээс хойш 16 настай хүү галт зэвсэг ашиглан халдлага үйлджээ. Үүний улмаас тав, найм, 11 настай гурван хүүхэд болон нэг багш амиа алдсан байна. Мөн долоон настай сурагч болон 54 настай багш хүнд шархдан, эмнэлэгт эмчлүүлж байгаа талаар цагдаагийн газраас мэдээллээ.
Хэрэг орон нутгийн цагаар 12:59 цагт эхэлсэн бөгөөд сэжигтэн эхлээд гадаа байсан улаан өнгийн пикап машин руу урт буугаар галласан байна. Үүний дараа сургуулийн түгжээтэй хаалганууд руу буудан цөм цохиж, дотогш дайран оржээ. Хэрэгтэн тус сургуультай ямар нэг холбоо хамааралтай байсан эсэх нь одоогоор тодорхойгүй байна.
Халдлага үйлдэгчийг гаднаас харсан нэгэн иргэн сургууль руу даган орж, түүнтэй тулгаран буудан хөнөөсөн гэж Бэнд хотын цагдаагийн дарга Майк Кранц мэдэгдэв. Цагдаагийн алба хаагчид уг дуудлага ирснээс хойш гурван минутын дараа сургууль дээр ирэхэд сэжигтэн аль хэдийн амиа алдсан байжээ.
Энэхүү халдлагын дараа орон нутгийн сургуулийн дүүргийн удирдлага эмгэнэл илэрхийлж, Бэнд хотын бүх сургуулийг баасан гарагт хичээллүүлэхгүй байх шийдвэр гаргав. 450 гаруй сурагч, 40 гаруй багш, ажилтантай уг сургуулийн хамт олонд нөхцөл байдлыг даван туулах хугацаа шаардлагатай гэж үзжээ. Америкийн 'K-12' сургуулийн зэвсэгт халдлагын судалгааны мэдээллээр өнгөрсөн онд тус улсын сургуулиудад 235 удаа галт зэвсэгтэй холбоотой хэрэг гарсан бол энэ он гарсаар 140 гаруй бүртгэгдээд байна.
