Йемений Хусит босогчид 10 дугаар сарын 15-ны пүрэв гарагт олон улсад хүлээн зөвшөөрөгдсөн Засгийн газрын түр нийслэл Аден хот руу пуужингаар цохилт өгсөн байна. Боомт хот дахь Аль-Маашик ордны орчимд хэд хэдэн удаа хүчтэй дэлбэрэлт болж, их хэмжээний утаа гарсан тухай газар дээрх гэрчүүд мэдээллээ.
Йемений Мэдээллийн яамнаас Ерөнхий сайд Шая аль-Зиндани болон Засгийн газрын гишүүд халдлагын үеэр бэртэж гэмтээгүй, аюулгүй байгааг албан ёсоор мэдэгдсэн байна. Гэвч уг дайралтын улмаас Ерөнхий сайдын хамгаалалтын албаны хоёр ажилтан амь үрэгдэж, 10 хүн шархадсан тухай албаныхан мэдээлэв. Төрийн ордны барилга цохилтод шууд өртсөн эсэх болон учирсан хохирлын бодит хэмжээ одоогоор тодорхойгүй байна.
Хуситуудын хэвлэл болон цэргийн хэвлэлийн төлөөлөгч Яхья Сари Саудын Арабын офицеруудын удирддаг цэргийн командлалын төв болон зэвсгийн агуулахуудыг онилсон хэмээн мэдэгдлээ. Тус улсын иргэний дайн өнгөрсөн есдүгээр сараас эхлэн эрчимжиж, Ираны дэмжлэгтэй Хуситууд Улаан тэнгисийн эрэг дагуух чухал газар нутгуудыг дахин эзэлсэн юм.
Саудын Арабын тэргүүлсэн эвсэл агаараас цохилт өгч байгаа ч босогчдын хяналтад орсон нутаг дэвсгэрийг буцаан авч чадаагүй байна. Үүний зэрэгцээ бүс нутгийн нөхцөл байдал улам хурцдаж, Хуситууд Саудын Арабын Медина хотыг онилсон пуужинг тус улсын агаарын довтолгооноос хамгаалах хүчин амжилттай устгажээ. Түүнчлэн Оманы буланд газрын тос тээвэрлэгч хөлөг онгоц шатаж, Ормузын хоолойд ачааны хөлөг онгоц минад дэлбэрэн сүйрсэн нь тэнгисийн замын аюулгүй байдалд түгшүүр дагууллаа.
