Зимбабвегийн зохиолч Симбараше Кундизеза 'Цэнхэр дайчин' богино хэмжээний өгүүллэгээрээ аравдугаар сарын 6-нд Африкийн зохиолчдын нэр хүндтэй Кейний шагналыг хүртсэн билээ. Гэвч уг явдлаас тав хоногийн дараа 'The Atlantic' сэтгүүлд нийтлэгдсэн шүүмж нийтлэл уг бүтээлийг хиймэл оюунаар бичигдсэн хэмээн хардсанаар уран зохиолын салбарт томоохон маргаан дэгдээв.
Сэтгүүлч Вохини Вара уг өгүүллэгийг 'Pangram' хэмээх илрүүлэгч программд оруулан шалгахад бараг бүхэлдээ хиймэл оюунаар бичигдсэн гэсэн хариу гарсныг онцолсон байна. Мөн тэрбээр зохиолын хэл найруулгаас хиймэл оюуны нийтлэг шинж чанарууд илэрхий ажиглагдаж байгааг дурдаад, түүний 2021 онд бичсэн өмнөх зохиол одоогийн бүтээлээс хэв маягийн хувьд тэс өөр байсныг BBC-д ярьжээ.
Харин зохиолч Кундизеза 'X' хуудсаараа дамжуулан гаргасан мэдэгдэлдээ бүтээлээ бүрэн өөрийн гараар туурвисан бөгөөд ямар ч хиймэл оюун ашиглаагүй болохоо хатуу илэрхийлэв. Тэрбээр зохиолч хүн цаг хугацааны эрхээр өөр хэв маягаар бичиж сурах боломжгүй гэж үзэж байгаа нь уран зохиолын ур чадварыг огт ойлгохгүй буйн шинж гэж тайлбарлалаа.
Кейний шагналын зөвлөлийн дарга Элла Вакатама хиймэл оюуныг илрүүлэгч программд хэт найдаж, бодит шалгалтгүйгээр уран бүтээлчдийг хууран мэхлэгч мэтээр зарлаж буйг эсэргүүцэж байгаагаа илэрхийллээ. Одоогоор тус шагналын хороо уг асуудлыг хүнлэг зарчмаар нухацтай нягтлан үзэж байгаагаа албан ёсоор мэдэгдсэн байна.
