Казахстан улсын Засгийн газар гадаадын иргэдийн зорчих хөдөлгөөнийг зохицуулах хүрээнд QazETA цахим зөвшөөрлийг 2027 оны долоодугаар сарын 1-нээс эхлэн бүрэн заавал шаардах шийдвэр гаргалаа. 2026 оны аравдугаар сарын 10-нд баталсан 890 дүгээр тогтоолоор өмнөх журмуудад өөрчлөлт оруулж, шинэ зохицуулалтыг 2026 оны аравдугаар сарын 24-ний өдрөөс албан ёсоор мөрдүүлж эхлэхээр товлов. Ингэснээр анх 2026 оны сүүлээр заавал мөрдүүлэхээр төлөвлөж байсан хугацааг хойшлуулж, шилжилтийн үеийг уртасгалаа.
Эрх баригчид уг системийг хилийн боомтуудад дөрвөн үе шаттайгаар нэвтрүүлнэ. Тухайлбал, 2026 оны арваннэгдүгээр сарын 1-нээс 2027 оны зургаадугаар сарын 30-ны хооронд QazETA аваагүй шалтгаанаар зорчигчийг хилээр нэвтрүүлэхээс татгалзахгүй. Энэ хугацаанд хилийн албаныхан иргэдэд шинэ шаардлагын талаар мэдээлэл өгч, сурталчлах чиглэлээр ажиллах юм. Одоогоор App Store болон Google Play сүлжээнд байршсан уг системийг турших бүрэн боломжийг олгож байна.
Цахим зөвшөөрөл нь юун түрүүнд Казахстан руу визгүй зорчдог орнуудын иргэдэд хамаарна. Үүнд АНУ, Их Британи, Канад, Австрали, Европын ихэнх орон, Япон, Өмнөд Солонгосоос гадна тусгай нөхцөлөөр зорчдог Энэтхэг, Иран, Туркийн иргэд багтаж байна. Түүнчлэн Евразийн эдийн засгийн холбооны гишүүн Орос, Беларусь, Армени, Киргиз улсын иргэдэд хамаарах заалт орсон бөгөөд үүнийг олон улсын гэрээ хэлэлцээртэй уялдуулан хэрэгжүүлэх шаардлагатай юм.
Шинэ журмаар QazETA зөвшөөрлийг ямар нэг хураамжгүй, үнэ төлбөргүй олгохоор эцэслэн баталлаа. Зөвшөөрлийг Казахстаны Дотоод хэргийн яам үндэсний аюулгүй байдлын байгууллагатай хамтран гаргах бөгөөд хилийн шалган нэвтрүүлэх дээр 'Беркут' нэгдсэн системээр шалгана. Зөвшөөрөл нь олгогдсон өдрөөс хойш 180 хоногийн хугацаанд хүчинтэй байх ч энэ нь тухайн улсад тасралтгүй оршин суух хугацааг заахгүй бөгөөд визгүй зорчих хуучин горим хэвээр үлдэнэ.
Түүнчлэн уг зөвшөөрөл нь хилээр шууд нэвтрэх баталгаа болохгүй, эрх бүхий байгууллагууд хуульд заасан үндэслэлээр нэвтрүүлэхээс татгалзах эрхтэй хэвээр байна. Харин дүрвэгсэд, орогнол хүсэгч, хүмүүнлэгийн тусламжийн цуваа болон онцгой байдлын үйл ажиллагаанд оролцогчдод энэ шаардлага хамаарахгүй. Насны онцлог, оршин суух зөвшөөрөл, хүчин төгөлдөр визтэй хүмүүст мөн хөнгөлөлттэй нөхцөл үйлчилнэ.
Казахстаны эрх баригчид энэхүү цахим системээр дамжуулан цахим виз болон зорчих зөвшөөрлийг нэгтгэн, иргэний биометрик өгөгдлийг гар утсаар дамжуулан баталгаажуулах боломжийг бүрдүүлсэн. Засгийн газрын энэхүү шийдвэр нь гадаадын зорчигчдод цахим системд дасах 8 сарын шилжилтийн хугацаа олгож, 2027 оны долоодугаар сарын 1-нээс хилийн хяналтыг шинэ стандартад бүрэн шилжүүлэх зорилготой юм.
