Венесуэлийн ерөнхийлөгч асан, 63 настай Николас Мадуро өнгөрсөн пүрэв гарагт Нью-Йорк хотын шүүхэд ирэхдээ шинэчилсэн яллах дүгнэлтийг худал хэмээн мэдэгдлээ. Түүнийг төрийн бодлогоор дарангуйлал тогтоож, АНУ-ын гурван иргэнийг оролцуулаад олон хүнийг эрүүдэн шүүсэн хэрэгт буруутгаж байгаа юм.
АНУ-ын цэргийн тусгай ажиллагаагаар Каракас дахь гэрээсээ баривчлагдсан Мадуро болон түүний эхнэр, 70 настай Силиа Флорес нарын гэм буруугүйг шүүгч Алвин К. Хеллерштейн албан ёсоор бүртгэв. Мадуро шүүх хурал дээр яллах дүгнэлтийг худал гүтгэлэг, хуурамч мэдүүлэг хэмээн эсэргүүцсэн байна.
Прокуроруудын танилцуулсан шинэчилсэн яллах дүгнэлтэд дурдсанаар, Мадуро хохирогчдыг зодож, цахилгаанаар цохиулах зэргээр эрүүдэн шүүх харгис тогтолцоог биечлэн удирдаж байжээ. Түүнчлэн Ерөнхий прокурор асан түүний гэргий Силиа Флорес уг харгис дарангуйллын тогтолцоог бүрдүүлэхэд тусалж, зарим хүнийг эрүүдэн шүүх даалгавар өгсөн гэж буруутгав.
Мадуро нь багш Уго Чавесийг хорт хавдраар нас барсны дараа буюу 2013 онд төрийн эрхэнд гарснаас хойших хүчирхийллийн хэргээр ийнхүү шалгагдаж байгаа юм. Мөн түүнийг өрсөлдөгчдөө харгислан нухчин дарсан хэмээн Олон улсын эрүүгийн шүүх (ОУЭШ) хүн төрөлхтний эсрэг гэмт хэргийн үндэслэлээр олон жилийн турш мөрдөж байна.
Өмгөөлөгчдийн зүгээс тэднийг гадаад улсын төрийн тэргүүн, тэргүүн хатагтай байсан тул халдашгүй эрх эдэлнэ гэдэг үндэслэлээр уг хэргийг хэрэгсэхгүй болгох хүсэлт гаргажээ. Шүүх хуралдааны явцад талууд зургаадугаар сарын 1-нд товлогдсон байсан шүүх хурлыг 14-ний өдөр болгон хойшлуулах хүсэлт гаргасныг шүүгч хүлээн авлаа.
