Фолклендийн арлуудын эрэг орчмын газрын тосны томоохон төсөлд ажиллаж буй хүмүүсийг баривчлуулах Аргентины хүсэлтийг няцаахыг Их Британийн засгийн газар Интерполоос шаардлаа. Аргентины ерөнхийлөгч Хавьер Милей 'Sea Lion' төслийг бүрэн зогсоохоо мэдэгдэж, оролцогчдыг нь эрүүгийн хэрэгт татан хөрөнгө оруулагчдыг сүрдүүлэх бодлого баримталж эхэлсэн юм. Лондон хотын зүгээс Францын Лион дахь Интерполын төвд хандан, Буэнос-Айресын 'улаан булант' мэдэгдэл хүссэн үйлдлийг улс төрийн зорилготой хэмээн тодорхойлжээ.
Өнгөрсөн онд 20,000 орчим гарсан тус лавлагааны хүрээнд гишүүн орнууд сэжигтнийг саатуулах эсэхээ шийддэг бөгөөд Интерпол дүрмийнхээ гуравдугаар заалтын дагуу улс төрийн хэрэгт оролцохгүйгээ мэдэгдсэн байна. Өмнөд Атлантын далай дахь Умард Фолклендийн сав газарт хэрэгжиж буй энэхүү төсөл нь арлын дотоодын нийт бүтээгдэхүүнийг гурав дахин өсгөх эдийн засгийн өндөр ач холбогдолтой юм. Гэвч Аргентины эрх баригчид төслийн гол түнш Израилийн 'Navitas' болон Их Британийн 'Rockhopper Exploration' компанийн удирдлагуудад эрүүгийн хэрэг үүсгээд байна.
Их Британийн Гадаад хэргийн сайд Эд Милибанд хууль тогтоомжийн хүрээнд бизнесийн салбараа хамгаалж, Аргентины дарамтаас үүдсэн хохирлыг шүүхээр нэхэмжлэх боломж бүрдүүлнэ гэдгийг мэдэгдэв. Тэрбээр ард иргэд хувь заяагаа өөрсдөө шийдэх, хууль ёсны дагуу бизнес эрхлэх эрхийг Лондон баттай хамгаална хэмээн цохон тэмдэглэжээ. Аргентины конгресст өргөн барьсан шинэ хуулийн төсөл нь уг төслийн нийлүүлэгчид төдийгүй тус бүс нутгийн эдийн засгийн гол тулгуур болсон загас агнуурын салбарыг хоригт хамруулахаар төлөвлөсөн аж.
Хоёр орны маргаантай байгаа уг бүлэг 700 арал нь Аргентины Патагоны өмнөд эргээс зүүн тийш 300 милийн зайд оршдог юм. Одоогоос 44 жилийн өмнө 74 хоног үргэлжилсэн дайнаас хойш талуудын харилцаа өнөөгийнх шиг хурцдаж байгаагүй бөгөөд тухайн цуст мөргөлдөөнд 649 аргентин, 255 британи цэрэг амиа алдаж байв. Гэвч Аргентин уг арлуудыг өөрийн газар нутаг гэж үзсээр байгаа төдийгүй 3600 оршин суугчийн 99.8 хувь нь Их Британийн бүрэлдэхүүнд үлдэх санал өгсөн 2013 оны бүх нийтийн санал хураалтыг хүлээн зөвшөөрдөггүй байна.
Аргентины тал төслийг зогсоох хоёр долоо хоногийн хугацаа шаардсан нь дууссан тул ойрын 24 цагийн дотор НҮБ-ын Далайн эрх зүйн конвенцын Арбитрын шүүхэд хандахаар зэхэж байна. Буэнос-Айрес Их Британийг нөхцөл байдлыг дангаар өөрчлөхгүй байх НҮБ-ын тогтоолыг зөрчсөн гэж буруутган өрөмдлөгийг хүчээр зогсоох шийдвэр гаргуулахаар зорьж буй юм. Харин арлын төлөөлөгчдийн танхимын гишүүн Дин Дент өмнө нь тус шүүхэд очсон газар нутгийн бүрэн эрхийн ижил төстэй дөрвөн маргааныг шүүх харьяаллын бус хэмээн хэрэгсэхгүй болгож байсныг санууллаа.
