Японы Хууль зүйн яамнаас гаргасан мэдээллээр тус улсад оршин суух гадаадын иргэдийн тоо 4 сая 281 мянга 26-д хүрч, өмнөх оны эцсээс 155 мянга 631 буюу 3.8 хувиар өсжээ. Үүнээс дунд болон урт хугацаагаар оршин суугч 4 сая 17 мянга 321, тусгай байнгын оршин суугч 263 мянга 705 байна. Хүйсээр авч үзвэл эрэгтэйчүүд 2 сая 192 мянга 764 буюу 51.2 хувийг, эмэгтэйчүүд 2 сая 88 мянга 199 буюу 48.8 хувийг эзэлж, бусад хүйсээр 63 хүн бүртгэгдэв.
Иргэдийн харьяаллыг авч үзвэл 195 улс, бүс нутгийн иргэд бүртгэгдсэнээс Хятад улсын 941 мянга 31 иргэн тэргүүлж, өмнөх оноос 10 мянга 603-аар нэмэгдсэн байна. Удаах байруудад Вьетнам 693 мянга 750 (нэмэгдсэн 12 мянга 650), Өмнөд Солонгос 408 мянга 682, Филиппин 362 мянга 761, Непал 334 мянга 850 (нэмэгдсэн 33 мянга 858), Индонез 307 мянга 456, Мьянмар 211 мянга 602 иргэнээр тус тус жагсчээ. Харин Бразилын 209 мянга 550, Шри-Ланкын 85 мянга 415, Тайванийн 73 мянга 628 иргэн оршин сууж байгаагаас Бразилаас бусад бүх орны иргэдийн тоо өссөн үзүүлэлттэй гарлаа.
Оршин суух статусын ангиллаар байнгын оршин суугч 961 мянга 342 байж хамгийн их хувийг эзэлсэн бол мэргэжлийн болон инженерийн чиглэлийн визтэй 516 мянга 184 иргэн бүртгэгдэв. Түүнчлэн оюутны визтэй 479 мянга 626, ур чадварын дадлагажигч 457 мянга 509, засгийн газраас дэмжиж буй тусгай ур чадварын визтэй ажиллагсад 444 мянга 256 болж, өмнөх оны мөн үеэс 53 мянга 960-аар эрс өссөн байна.
Бүс нутгийн хувьд гадаадын иргэдийн 19.3 хувь буюу 824 мянга 486 нь Токио хотод төвлөрч, 23 мянга 48-аар нэмэгджээ. Түүнчлэн Осака мужид 389 мянга 846, Айчид 369 мянга 849, Канагавад 331 мянга 515, Сайтамад 305 мянга 867 иргэн амьдарч байгаа нь томоохон хотуудад ажиллах хүчний төвлөрөл үргэлжилсээр байгааг харууллаа.
