Германы Магдебург хотын шүүх 2024 онд Зул сарын захад халдаж, зургаан хүний аминд хүрсэн хэрэгт Саудын Арабын иргэн Талеб Аль-Абдулмохсеныг буруутай гэж үзэн, бүх насаар нь хорих ял оноолоо. 51 настай түүнд шүүх дээд хэмжээний ял ногдуулсан байна. Прокурорууд Талеб Аль-Абдулмохсен 2024 оны 12 дугаар сарын 20-ны орой 19:02 цагт Магдебургийн төв дэх Зул сарын захаар түрээсийн BMW автомашиныг цагт 48 км хурдтайгаар давхиулж, халдлага үйлдсэн гэж мэдэгдэв. Халдлага ердөө нэг минут дөрвөн секунд үргэлжилсэн бөгөөд есөн настай хүү, 45-75 насны таван эмэгтэй амиа алдаж, 300 орчим хүн шархаджээ. Түүнийг хэргийн дараа шууд баривчилсан бөгөөд прокурорууд халдлагыг урьдчилан төлөвлөж, ганцаараа үйлдсэн гэж тогтоосон байна. Тэрээр ямар нэгэн үзэл суртлын зорилгогүй, хувийн сэдэл дээр тулгуурлан үйлдэл хийсэн гэж шүүх дүгнэжээ.
Германы Зул сарын зах руу халдсан этгээдэд бүх насаар нь хорих ял оноов
