Францын ерөнхийлөгчийн сонгуульд өрсөлдөгч, хэт зүүний үзэлт улс төрч Жан-Люк Меланшоныг нутаг дэвсгэртээ нэвтрүүлэхийг хориглож буйгаа Израилийн Засгийн газар пүрэв гарагт зарлав. Хэрэв төрийн тэргүүнээр сонгогдвол Газын зурваст тусламж хүргэх тэнгисийн цувааг Францын хөлөг онгоцоор хамгаалуулан хүчээр нэвтрүүлнэ гэж Меланшон мэдэгдсэний хариуд уг арга хэмжээг авчээ.
Израилийн Гадаад хэргийн яамнаас гаргасан мэдэгдэлд тус улсад хор хөнөөл учруулахыг эрмэлзэж буй этгээдүүдэд хатуу хариу арга хэмжээ авах ба иргэдийнх нь эсрэг өдөөн хатгалга явуулдаг хүмүүсийг хилээрээ нэвтрүүлэхгүй гэдгийг онцолсон байна. Түүнчлэн Меланшоны тэргүүлдэг 'Бууж өгөөгүй Франц' намын парламентын бүлгийн дарга Матильда Паног ч мөн адил нэвтрүүлэхгүй гэдгээ мэдэгджээ.
Энэхүү шийдвэр нь Францын эрх баригчид эзлэгдсэн Баруун эрэг дэх суурингуудын асуудал хариуцсан байгууллагын удирдагчид виз олгохоос татгалзсаны дараагийн өдөр гарсан байна. Израилийн бодлогыг эрс шүүмжилдэг Меланшон өнгөрсөн бямба гарагт үг хэлэхдээ, Газын зурвас болон Баруун эргийн палестинчуудыг шууд дэмжиж, шаардлагатай бол тусламжийн хөлөг онгоцуудыг хамгаалах үүргийг Францын тэнгисийн хүчинд өгнө хэмээн мэдэгдээд байв.
ХАМАС бүлэглэл 2007 онд Газад хяналтаа тогтоосноос хойш Израилийн тал бүслэлт тогтоосон бөгөөд 2023 оны аравдугаар сарын 7-ны халдлагаас хойш хяналтаа улам чангатгасан юм. Тусламжийн цувааг тэнгисээр нэвтрүүлэх гэсэн идэвхтнүүдийн оролдлогыг Израилийн тал удаа дараа саатуулаад байна. Өмнө нь Лондон суурингуудын бараа бүтээгдэхүүнд хориг тавьсны дараа Израиль Их Британийн сөрөг хүчний гишүүн Жереми Корбин тэргүүтэй зүүний үзэлт хууль тогтоогчдод хилээр нэвтрэх хориг тавьж байжээ.
