Их Британийн нийслэл Лондон хотын зүүн өмнөд хэсэгт орших Льюишам дүүргийн эрүүл мэндийн байгууллагаас Энтони Ллойд хэмээх хоригдол баасан гаргийн 16:00 цагийн үед хүч хэрэглэн оргосон тухай Метрополитан цагдаагийн газар мэдээллээ. Цагдаагийн байгууллагаас түүнийг өөртөө болон бусдад аюул занал учруулах эрсдэлтэй гэж үзэн, олон нийтэд хандан эрэн сурвалжлах ажиллагааг шуурхай эхлүүлээд байна.
Эрэн сурвалжлагдаж буй 38 настай Ллойд нь 2025 онд Ноттингемширт яаралтай тусламжийн гурван ажилтны биед халдаж, гэмтэл учруулсан хэргээр 12 сар хоригдох ял шийтгүүлсэн нэгэн юм. Түүнийг хорих ангиас есдүгээр сард Льюишам дахь эмчилгээний байгууллагад шилжүүлээд байжээ. Хамгийн сүүлд баасан гаргийн 16:10 цагийн орчимд түүнийг Кэтфордын зүг чиглэн явж байхыг харсан байна.
Цагдаагийн тодорхойлсноор, оргодол нь 173 см орчим өндөртэй, дунд зэргийн бие бялдартай, богино бараан үстэй, цагаан арьст эрэгтэй аж. Оргох үедээ саарал цэнхэр өнгийн футболк, хар бэлтгэлийн өмд, цагаан пүүз өмссөн байжээ. Албаныхан түүнийг нийслэл хотын аль ч хэсэгт байж болзошгүй гэж таамаглаж байгаагаас гадна Суррей, Сассекс, Темз Валли, Хэмпшир, Ноттингемшир, Дербишир, Мерсисайд зэрэг бүс нутгуудтай холбоотойг онцолсон байна.
Эрэн сурвалжлах ажиллагааг ахалж буй детектив суперинтендант Мелани Прессли олон нийтэд хандан уг этгээдтэй таарвал биечлэн ойртохгүй байхыг анхааруулав. Тэрбээр оргодлын талаар ямар нэгэн мэдээлэл авсан, харж сэжиглэсэн хүн бүрийг яаралтай 999 дугаарын утсанд холбогдож, холбогдох дугаарыг дурдан мэдээлэл өгөхийг уриаллаа.
