Их Британийн нийслэлийн цагдаагийн газар буюу Скотланд-Ярд Сассексийн гүнгийн авхай Меган Марклын төрсөн эцэг Томас Марклтай холбоотой ноцтой гомдлын талаар 2019 онд гүнгийн авхайд мэдэгдсэн боловч уг мэдээллийг хууль сахиулах бусад байгууллагад дамжуулаагүй болохоо албан ёсоор баталлаа. Баасан гарагт хэвлэлээр Томас Марклыг хүүхдийн садар самуун бичлэг, гэрэл зураг хадгалсан байж болзошгүй тухай мэдээлэл цацагдсаны дараа уг тайлбарыг хийв.
Цагдаагийн байгууллагын систем, баримтад хийсэн шалгалтаар 2019 оны нэгдүгээр сард Их Британи улсын нутаг дэвсгэрийн гадна үйлдэгдсэн гэмт хэргийн талаарх захидлыг хүлээн авсан нь тогтоогдсон байна. Тус захидал нь Меган Марклын аюулгүй байдлыг хангах албанд ирсэн бөгөөд эрх бүхий албан тушаалтнууд үүнийг Сассексийн гүн болон гүнгийн авхайн ажлын албанд танилцуулахаар шийдвэрлэжээ. Гэвч тухайн мэдээллийг дотоодын болон гадаадын бусад мөрдөн шалгах байгууллагад албан ёсоор хүргүүлээгүй аж.
Үүний улмаас Лондон хотын цагдаагийн газар 2019 онд уг асуудлыг хэрхэн шийдвэрлэсэн явцыг дахин шалгаж, Цагдаагийн ёс зүйн хараат бус албанд (IOPC) шилжүүлэн шалгуулах шаардлагатай эсэхийг судалж эхэлжээ. Хэрэв тус байгууллагад хандвал цагдаагийн алба хаагчид тухайн үед мэдээллийн мөрөөр хуулийн дагуу арга хэмжээ авсан эсэхийг хөндлөнгийн хяналтаар эцэслэн тогтоох юм.
Энэхүү хэрэг The Sun сонинд гарсан мэдээллээр олны анхааралд өртсөн билээ. Меган Марклын нэг эцэгтэй ах, 60 настай Томас Маркл Жр гэгч Филиппиний Себу хотод байрлах эцгийнхээ өмнө нь амьдарч байсан байшингаас дөрвөн том хайрцагтай компьютер, гар утас олсон бөгөөд дотор нь хүүхдийн садар самууныг харуулсан олон зуун, магадгүй мянга мянган хууль бус зураг, дүрс бичлэг байсан гэж мэдэгдсэн байна. Ах нь энэ талаар Филиппиний эрх баригчдад хандсанаас гадна АНУ-ын Холбооны мөрдөх товчоонд (ФБТ) мэдэгдсэн гэжээ. Томас Маркл нь тархины цус харвалт авсныхаа дараа өнгөрсөн тавдугаар сард АНУ-д буцан ирсэн юм.
Харин Меган Марклын төрсөн эцэг өөрт нь тулгасан эдгээр буруутгалыг эрс няцааж, Daily Mail сонинд өгсөн ярилцлагадаа энэ бүхнийг 'жигшүүрт гүтгэлэг' хэмээн тодорхойлсон байна. Тэрээр өөрийнхөө нэр хүндийг хамгаалахаа мэдэгдэж, охинтойгоо олон жил харилцаа тасарсан байдлыг дахин дурджээ.
Гүнгийн авхай Меган баасан гарагт хэвлэлийн төлөөлөгчөөрөө дамжуулан хийсэн мэдэгдэлдээ сүүлийн 24 цагийн дотор ил болсон мэдээлэлд гүнээ цочирдож байгаагаа илэрхийлсэн байна. Тэрээр долоон настай хунтайж Арчи, таван настай гүнж Лилибет нарыг өвөөтэй нь хэзээ ч уулзуулаагүй бөгөөд эцгээсээ хол хөндий байсан нь зөвхөн хүүхдүүдийнхээ аюулгүй байдлыг хамгаалах цорын ганц зорилготой байсныг онцоллоо. Хэдийгээр Меган Маркл эхэндээ энэ явдлыг 2018 онд тохиолдсон хэмээн эндүүрсэн ч цагдаагийн бүртгэлд үндэслэн 2019 онд мэдсэн болохоо залруулан тайлбарласан байна.
