Их Британид ажиллаж буй сэтгүүлчдийн амь насанд халдах төлөвлөгөөнд оролцож, Ираны тагнуулын байгууллагад тусалсан хоёр эрийг Лондонгийн шүүх буруутай гэж үзлээ. Тэднийг 2024 оны наймдугаар сараас өнгөрсөн оны гуравдугаар сарын хооронд тус улс дахь тодорхой хүмүүсийг мөрдөж, тагнасан хэрэгт ялласан байна.
Шүүгдэгч 41 настай Мостафа Сепахванд, 46 настай Фархад Жавади Манеш нар 2016-2022 оны хооронд Их Британид хууль бусаар нэвтэрч, түр орогнол авчээ. Сепахванд ачааны машины тэвшинд, Манеш жижиг завьтай ирсэн бөгөөд хоёул байнгын албан ёсны ажлын байргүй байсныг шүүх хуралдааны үеэр дурдав.
Тэд Ираны эрх баригчдыг шүүмжилдэг 'Iran International' телевизийн хоёр сэтгүүлч болон Израилийг дэмжигч хуульчдын холбооны гишүүн Жонатан Тернерийг бай болгон мөрдсөн аж. Сепахванд 'ChatGPT' ашиглан сэтгүүлч Можтаба Поурмохсений гэрийн хаягийг хайж, зургийг нь авч, цахим сүлжээгээр Исламын хувьсгалт гвардын захиалагч руугаа илгээсэн байна.
Шүүх хуралдаанд танилцуулсан дуут зурваст Сепахванд байг устгасны дараа 150,000 фунт стерлинг авахаар тохиролцсон нь ил болсон юм. Мөн заналхийлэлд өртсөн 51 настай егөөч Камбиз Хоссейни машинаа асаавал дэлбэлнэ гэсэн сүрдүүлэг хүлээн авсны улмаас уран бүтээлээ зогсоож, гэр орноо орхихоос өөр аргагүй болжээ.
Ираны дэглэм хилийн чанад дахь шүүмжлэгчдээ дарахын тулд гэмт бүлэглэл болон хувь хүмүүсийг хөлсөлдөг болохыг прокурор онцоллоо. Өнгөрсөн сард Ираны талын дэмжлэгтэй бүлэглэлд хөлслөгдсөн 19 настай Норвегийн иргэн Йоханнес Натланд Хаддерсфилдэд хүний амь бүрэлгэхээр төлөвлөснийхөө төлөө бүх насаараа хоригдох ял авсан юм.
Үүнтэй адил арга замаар өмнө нь Их Британийн Ерөнхий сайд Кир Стармерын өмчид гал тавьсан 22 настай Роман Лавринович долоо, 27 настай Станислав Карпиук хоёр жилийн ял сонсоод байна. Мөн өнгөрсөн онд Оросын талд London хотын агуулахыг шатаалгасан Британийн зургаан иргэнд шүүхээс ял оноосон гашуун түүх бий.
Тангарагтны шүүх Сепахвандыг гадаадын тагнуулын байгууллагад тусалсан, халдлага үйлдэхээр бэлтгэсэн хэрэгт, харин Манешийг зөвхөн тусалсан гэм буруутайд тооцов. Харин хамт шалгагдаж байсан Илингийн оршин суугч 57 настай Шапур Нуриг гэм буруугүйд тооцож, шүүгдэгчдийг арванхоёрдугаар сарын 17-нд шийтгэхээр товлолоо.
