Квинслэнд мужийн Маунт Айза хотод цагдаагийн алба хаагч халдлагад өртөж, эрүү болон хамартаа хүнд гэмтэл авсны дараа тус мужийн Цагдаагийн үйлдвэрчний эвлэл (QPU) хуулийн хариуцлагыг чангатгахыг шаардаж эхэллээ. Аравдугаар сарын 30-ны шөнийн 02:30 цагийн орчимд гурван цагдаагийн алба хаагч маргаанд холбогдсон бөгөөд нэг алба хаагч эмнэлэгт хүргэгдсэн юм. Энэхүү хэрэгтэй холбогдуулан 24 болон 26 настай хоёр эрэгтэйд эрүүгийн хэрэг үүсгэн шалгаж байна.
Цагдаагийн үйлдвэрчний эвлэлийн ерөнхийлөгч Шейн Прайор алба хаагчдын аюулгүй байдлыг хамгаалахын тулд цагдаад ноцтой халдсан тохиолдолд хорих ялын доод хэмжээг хуулиар заавал оноодог болох шинэчлэл хийхийг ерөнхий прокурорт уриалав. Тэрбээр 'Цагдаа руу халдсан л бол шоронд суух ёстой бөгөөд энэ нь олон нийтийн хүлээлтэд нийцнэ' гэж мэдэгдсэн байна.
Квинслэндийн Ял оноолтын зөвлөлийн 2025 оны тоо баримтаас үзвэл цагдаагийн эсрэг үйлдсэн хүнд халдлагын тоо өссөн дүнтэй байна. Тодруулбал, 2019-2020 оны санхүүгийн жилд насанд хүрэгчид цагдаад халдсан 220 хэрэгт шийтгэл оноож байсан бол сүүлийн санхүүгийн жилд энэ тоо 360 болж нэмэгджээ. Түүнчлэн 2020-2025 оны хооронд цагдаад халдсан хэргүүдийн 48 хувьд нь хорих ял оноосон бол 20 хувийнх нь ялыг бүрэн тэнсэж байжээ.
Гриффитийн их сургуулийн хуулийн ахлах багш, доктор Саймон Маккензи ялын доод хэмжээг зааж өгөх нь гэмт халдлагыг таслан зогсоох үр дүнтэй арга биш гэдгийг онцоллоо. Түүний хэлснээр урьдчилан заасан хатуу ял нь шүүхийн ачааллыг нэмэгдүүлж, гэм буруугаа хүлээх магадлалыг бууруулдаг төдийгүй шоронгийн хүн амыг нэмэгдүүлэх сөрөг талтай аж.
Квинслэнд мужийн Ерөнхий прокурор Дэб Фреклинтон цагдаад халдсан этгээдүүдэд ялын доод хэмжээ тогтоох хуулийг хэлэлцэх эсэх талаар тодорхой хариулт өгөөгүй ч аюулгүй байдлыг хангах үүднээс шаардлагатай бол хууль эрх зүйн зохицуулалтыг чангатгасаар байх болно гэдгээ илэрхийлэв.
