Сөүл хотын галт тэрэгний төв буудлын арын хаалганы ойролцоо байрлах 'Dream City' төв нь өдөр бүр 300 гаруй ахмад настныг хүлээн авдаг хамгийн дулаан орчин байв. Энд цагаан үстэй буурлууд хямд кофе уун зурагт үзэж, үнэ төлбөргүй үсээ засуулан, подвалын өрөөнд компьютер ашиглаж, 'бадук' буюу даам, солонгос шатар тоглож өдрүүдийг өнгөрөөдөг байлаа. Тус төвийг 2011 оноос хойш ажиллуулж буй пастор Ү Ён Шик ахмад настнуудад ямар нэгэн шаардлага тулгалгүй зөвхөн бусадтай хамт байх, ярилцах боломжийг олгож иржээ.
Өмнөд Солонгос нь Эдийн засгийн хамтын ажиллагаа, хөгжлийн байгууллагын (OECD) орнууд дундаа ахмадуудын амиа хорлолтын түвшнээр тэргүүлж буй нь томоохон асуудал болоод байна. Пастор Ү Ён Шикийн дурдсанаар тус улсад 100,000 хүн тутамд ногдох амиа хорлолт 29.1 байгаа бол 65 ба түүнээс дээш насныханд энэ тоо 40.6 болж өсдөг аж. Түүнчлэн 80-аас дээш насны эрэгтэйчүүдийн дундах амиа хорлолт улсын дунджаас даруй гурав дахин их байна.
Тусгаарлагдсан хүмүүс нас барсны дараа цогцос нь удаан хугацаанд мэдэгдэхгүй өнгөрөх 'годокса' буюу ганцаардмал үхлийн тохиолдол сүүлийн жилүүдэд дээд хэмжээндээ хүрлээ. Эрүүл мэнд, нийгмийн хамгааллын яамны тайланд дурдсанаар 2023 онд ийм тохиолдлуудын 61.8 хувийг 50 болон 60 насныхан эзэлжээ. Мөн гэр бүл, ойр дотныхон нь цогцсыг нь авахаас татгалзсан эсвэл хамаатан садан нь олдоогүй нас барагсдын 60.1 хувь буюу 4,310 нь 65 ба түүнээс дээш насны ахмадууд байсан нь 2021 оныхоос 133 хувиар өссөн үзүүлэлт болов.
Сөүл хотын Төпгол цэцэрлэгт хүрээлэнд цуглардаг ахмадуудын дунд ч ганцаардлын уур амьсгал зонхилдог. Тэнд ихэнх нь зөвхөн үнэгүй хоолны оочерт зогсохоос биш хоорондоо чөлөөтэй ярилцах нь ховор, ихэнхдээ ганцаараа суун алсыг ширтэж өдрийг бардаг аж. Албан ёсны судалгаагаар тус улсын ахмад настнуудын 43.5 хувь нь өөрсдийгөө ганцаардмал гэж тодорхойлсон бөгөөд ганц бие амьдардаг иргэдийн дунд сэтгэл зүйн дарамт илүү хүнд тусдаг нь батлагджээ.
Өндөр настнуудад өдөржин дулаан суух орчин, цахилгаан, халуун ус, хууль зүй болон эмнэлгийн үйлчилгээ үзүүлдэг 'Dream City' төв санхүүгийн хүндрэлд орсон байна. Байрны сарын түрээс өмнө нь 5.8 сая вон байсан бол сүүлийн жилүүдэд 12-13 сая вон болж огцом өсжээ. Үүний улмаас тус төв Сөүл дэх үйл ажиллагаагаа зогсоож, 10 дугаар сарын сүүлээр Кёнги аймгийн Бүчон хотын Вонми дүүрэг рүү нүүхээр шийдвэрлэсэн байна.
Шинжээчдийн үзэж буйгаар бусадтай харилцах боломжийг бүрдүүлж өгөх нь ахмадуудын тархины танин мэдэхүйн үйл ажиллагаа болон бие махбодын эрүүл мэндэд нэн чухал нөлөө үзүүлдэг. Тогтмол харилцан яриа өрнүүлэх нь тухайн хүний эрүүл мэндийн байдал муудаж байгааг эрт илрүүлэх, сэтгэл санааны дэмжлэг үзүүлэх ач холбогдолтой тул орон нутгийн төвүүдийг дэмжих, төрийн тусламжийг өргөжүүлэх шаардлагатай байгааг мэргэжилтнүүд онцоллоо.
