Өмнөд Солонгосын Батлан хамгаалахын сайд Кан Шин Чол АНУ-ын Батлан хамгаалахын нарийн бичгийн дарга Пит Хэгсэт нар Филиппинд хоёр талын уулзалт хийнэ гэж аравдугаар сарын 27-ны өдөр Сөүлийн албаны эх сурвалж мэдээллээ. Энэхүү уулзалт нь Кан Шин Чол өнгөрсөн есдүгээр сард ажлаа хүлээн авснаас хойших тэдний анхны нүүр тулсан уулзалт болох гэж байна.
Талууд Себу хотноо болох АСЕАН-ы Батлан хамгаалахын сайд нарын өргөтгөсөн чуулганы өмнөх өдөр ганцаарчлан уулзахаар товложээ. Кан сайд мягмар гарагт бүс нутгийн аюулгүй байдлын чуулганд оролцохоор мордсон бөгөөд холбогдох бусад орны сайд нартай цуврал уулзалт хийхээр төлөвлөв.
Уулзалтын гол сэдэв нь дайны цагийн цэргийн ажиллагааны хяналтыг Вашингтоноос Сөүлд шилжүүлэх үйл явц байх төлөвтэй байна. Ли Жэ Мёнгийн засаг захиргаа уг хяналтыг 2030 онд дуусах бүрэн эрхийн хугацаанаасаа өмнө багтаан эргүүлэн авахыг зорьж байгаа юм.
Кан Шин Чол чуулганы үеэр Умард Солонгосын хилийн бүс дэх мина дэлбэлсэн үйлдэл хууль бус болохыг буруушааж, яриа хэлэлцээг сэргээхийг уриалахаар төлөвлөжээ. Өнгөрсөн есдүгээр сарын 21-нд хилийн шугамын өмнөд хэсэгт мина дэлбэрсний улмаас Өмнөд Солонгосын гурван цэрэг хүнд, хөнгөн шархадсан байна.
Энэ удаагийн чуулган нь АСЕАН-ы гишүүн 11 орон болон АНУ, Хятад, Япон зэрэг түнш улсуудыг нэгтгэсэн бүс нутгийн хамтын ажиллагааны чухал талбар болж байна. Филиппин улс энэ жилийн цуврал форумуудыг даргалан зохион байгуулж байгаа юм.
