Их Британид хувийн авто зогсоолуудын үндэслэлгүй өндөр торгууль оноодог явдлыг таслан зогсоох шинэ журам боловсруулж буйг Манчестер хотын захирагч Энди Бөрнэм танилцууллаа. Англи, Шотланд, Уэльсийн нутаг дэвсгэрт хэрэгжих албан ёсны шинэ дүрмийн дагуу жолооч нарт машинаа тавих эсэхээ шийдэх баталгаат таван минут, төлбөрт хугацаа дууссаны дараа зогсоолыг орхин гарахад 10 минутын хөнгөлөлттэй хугацаа олгох юм.
Засгийн газар уг шинэ дүрэм журмыг парламентад өргөн барихаар төлөвлөсөн бөгөөд сайд нар боломжит богино хугацаанд хүчин төгөлдөр болгохоо мэдэгдээд байна. Уг журамд зам асуухаар түр зогсох, эрүүл мэндийн яаралтай тусламж авах, машин эвдрэх, төлбөрийн машин ажиллахгүй байх зэрэг санамсаргүй нөхцөлд оноосон торгуулийг гомдол гаргасны үндсэн дээр бүрэн хүчингүй болгохоор заажээ. Мөн зөвшөөрлийн бичгээ байрлуулахаа мартах, улсын дугаараа буруу шивэх зэрэг алдаа гаргасан тохиолдолд торгуулийн дээд хэмжээ 20 фунт стерлинг байх юм.
Гэсэн хэдий ч өргөн хэрэглээний бараа бүтээгдэхүүний 'Which?' судалгааны байгууллага уг төслийг хэтэрхий хангалтгүй гэж шүүмжлэв. Тус байгууллага дээд торгуулийг 50 фунт стерлинг болгон бууруулах, бие даасан давж заалдах байгууллага байгуулах, мөн хугацаа хэтэрсний төлбөрт нэмэгддэг 70 фунт стерлингийн хураамжийг цуцлахыг шаардаж байсан ч Засгийн газар одоогийн 100 фунт стерлингийн дээд хязгаарыг хэвээр үлдээсэн байна.
Их Британид хувийн компаниудын олгосон зогсоолын торгуулийн тоо сүүлийн жилүүдэд огцом нэмэгдэж байна. RAC байгууллагын мэдээлснээр 2025-2026 онд оноосон нийт торгуулийн тоо өмнөх оноос 17 хувиар өсөж, 16.9 сая хүрсэн нь түүхэн дээд үзүүлэлт болоод байгаа юм. Энэ төрлийн реформыг 2019 онд баталж, 2022 онд журам гаргасан ч хувийн компаниудын шүүхийн маргааны улмаас цуцлагдаж байв.
Энди Бөрнэм энэ талаар мэдэгдэхдээ 'Машиндаа хэдхэн минут хоцорч ирсэн, эсвэл улсын дугаарынхаа нэг тоог буруу бичсэний төлөө гэрт тань асар өндөр торгуулийн хуудас очих учиргүй. Энэ бүхэн иргэдийг залилж, санхүүгийн дарамтад оруулж байгаа тул бид илүү тодорхой дүрэм, урт хугацааны хөнгөлөлт тогтоож эцэс болгоно' гэж онцоллоо.
