Их Британийн Үндэсний эрүүл мэндийн албаны (NHS) сэтгэцийн эмнэлэгт эмчлүүлж, саатуулагдсан хүнд гэмт хэрэгтнүүд улсаас халамжийн тэтгэмж авах боломжийг хаахаар боллоо. Хохирогчдын ар гэрийнхний удаа дараа тавьсан шаардлагын дагуу засгийн газар холбогдох журмын төслийг парламентад өргөн барьсан тухай Press Association мэдээлэв.
Өнөөдрийн байдлаар мөрдөгдөж буй хуулийн цоорхойн улмаас эмнэлгийн бүрэн хангалтад байгаа ялтнууд амьжиргааны зардалд зориулж сар бүр 800 хүртэлх фунт стерлингийн халамжийг (Universal Credit) олон жилийн турш давхар авах боломжтой байжээ. Шинэ журам хэрэгжиж эхэлснээр 'давхар хангамж' бүрэн зогсож, улсын төсвөөс жил бүр хэдэн арван сая фунт стерлинг хэмнэнэ гэж тооцоолсон байна.
Засгийн газар уг шийдвэрийг хохирогчдын гэр бүл болон мэргэжилтнүүдтэй зөвшилцсөний үндсэн дээр нийгмийн халамжийн тогтолцоонд шударга ёсыг эргүүлэн авчрах зорилгоор гаргаснаа онцоллоо. Уг зохицуулалтыг парламент баталсны дараа ирэх оны эхээр албан ёсоор хүчин төгөлдөр мөрдөж эхлэх төлөвтэй байна.
Ноттингем хотод 2023 онд Валдо Калоканы гарт амиа алдсан Барнаби Уэббер болон Грейс О'Малли Кумар нарын эцэг эх засгийн газрын энэхүү мэдэгдлийг талархан хүлээн авч буйгаа илэрхийлжээ.
