Их Британийн Эрүүл мэндийн сайд асан Алан Милбурн засгийн газраас явуулсан судалгааны тайландаа халамжийн зардлыг танаж, залуучуудын хөдөлмөр эрхлэлтийг дэмжихэд зарцуулахыг сайд нарт уриаллаа. Түүний үзэж буйгаар суралцдаггүй, ажил эрхэлдэггүй, мэргэжил эзэмшдэггүй буюу 'Neet' ангиллын залуусын хямралыг эцэслэхийн тулд нийгмийн халамжийн тогтолцоог үндсээр нь өөрчлөх шаардлага тулгарчээ. Энэхүү санал нь төсвийн алдагдлыг нөхөх, амьжиргааны зардлыг бууруулах амаргүй үүрэгтэй нүүр тулаад буй Лейборист намын засгийн газрын хүрээнд багагүй маргаан дагуулахаар байна.
Милбурний хийсэн үнэлгээгээр Их Британид 18-аас 24 насны 1 сая орчим залуус ажил, боловсролын гадна үлдэж, түүхэн дээд хэмжээнд хүрсэн тооцоо гарчээ. Судалгаагаар эдгээр залуусын 60 хувь нь амьдралдаа огт ажил хийж үзээгүй болох нь тогтоогдсон байна. Тэрбээр энэ асуудлыг зөвхөн ажилгүйдлийн түр зуурын хэлбэлзэл гэж харах бус, нийгмээс бүрэн хөндийрсөн гүн хямрал хэмээн тодорхойлов.
Залуусын энэхүү хямрал нь сэтгэцийн эрүүл мэндийн хурцадмал байдалтай шууд холбогдож байгааг албаныхан анхааруулав. Сэтгэцийн эрүүл мэнд, аутизм болон анхаарал хомсдолын эмгэгийн бие даасан үнэлгээний багийг ахалсан Питер Фонагитай хамтарсан ярилцлагадаа Милбурн эрүүл мэнд, хөдөлмөр эрхлэлт хоёр салшгүй холбоотойг онцоллоо. Хэрэв бодит арга хэмжээ авахгүй бол тус улсын залуучуудын дөрөвний нэг нь сэтгэцийн эмгэгтэй болж, хөдөлмөрийн зах зээлээс бүрэн шахагдах эрсдэл бийг шинжээчид сануулав.
Одоогийн халамжийн тогтолцоо залууст боломж олгохоос илүүтэй бэлэн мөнгө олгож, насан туршдаа тэтгэмжээс хамааралтай амьдрах зам руу түлхэж байгааг тайланд шүүмжилжээ. Шинэчилсэн зөвлөмжийн дагуу залуусын чадвар, сонирхолд нийцсэн ажлын байр бэлтгэх хөтөлбөр, хувийн эрүүл мэндийн төлөвлөгөөг боловсруулах бөгөөд зөвхөн эмнэлгийн оношилгоог хүлээлгүйгээр хэрэгцээ үүссэн цагт нь тусламж үзүүлдэг болох тогтолцоог санал болгож байна.
Энэ төрлийн өргөн хүрээний шинэчлэлийг эхлүүлэхийн тулд урьдчилгаа хэлбэрээр хэдэн зуун сая фунт стерлингийн хөрөнгө оруулалт хийх шаардлагатай гэж шинжээчид тооцоолжээ. Сангийн сайд Жон Хили саяхан болсон намын бага хурлаар 100 сая фунт стерлингийн орон нутгийн мэргэжлийн дадлагын үйлчилгээг санхүүжүүлэхээ зарлаж, залуусын төлөө богино хугацаанд төсөв зарцуулахад бэлэн байгаагаа илэрхийлсэн юм.
Халамжийн төсвийг дунд хугацаанд бодитоор танахын тулд эхлээд залуусыг ажлын байраар бүрэн хангах дэд бүтцийг бий болгох ёстойг шинжээчид цохон тэмдэглэж байна. Энэ үйл явц нь залуусын сэтгэцийн эрүүл мэндийн тусламж үйлчилгээг оочерлож хүлээх хугацааг багасгахад давхар эерэг нөлөө үзүүлнэ гэж найдаж буй бөгөөд хариуд нь ажил эрхлэх боломжийг бүрэн ашиглах үүрэг хариуцлагыг иргэдэд ногдуулах зарчим үйлчлэх юм.
