Хорватын Сплит хотын цагдаагийн газар орон нутгийн Хайдук багийн дор хаяж 12 хөгжөөн дэмжигчийг хүчирхийлэл, үзэн ядалтыг өдөөн турхирсан хэргээр баривчилжээ. Пүрэв гарагийн орой Нидерландын Аякс багийн эсрэг хийсэн тоглолтын өмнө болон үеэр танхайрсан дэмжигчид еврейчүүдийн эсрэг жагсаал зохион байгуулж, цагдаа нартай мөргөлдөн, тоглолтыг тасалдуулсан байна.
Мянга мянган хөгжөөн дэмжигч еврейчүүдийг доромжилсон үг хэлж, нацистын удирдагч Адольф Гитлерийг магтан дуулжээ. Тэд Амстердамын еврейчүүдийн нийгэмлэгтэй эртнээс холбогдож ирсэн Аякс багийн нэрийг бичсэн авсны загварыг автомашин дээр байрлуулан, араас нь жагссан аж. Мөн тоглолтын үеэр талбай руу галт бамбар болон бусад эд зүйлс шидсэнээр тэмцээн 12 минутын турш саатжээ.
Энэхүү үйлдэл Хорват даяар хүчтэй эсэргүүцэлтэй тулгарав. Тус улсын Ерөнхийлөгч Зоран Миланович болон консерватив засгийн газар танхайрагчдыг хатуу шүүмжилж, хатуу шийтгэл оноохыг шаардлаа. Миланович Хорватад нацизмыг алдаршуулах орон зай байхгүйг харуулах арга хэмжээ авахыг уриалав. Түүнчлэн Загреб дахь Израилийн элчин сайдын яам уг явдалд гүнээ цочирдсоноо илэрхийлж, холбогдох хариу арга хэмжээ авахыг хүсжээ.
Хорватын Хөлбөмбөгийн Холбоо албан ёсны мэдэгдэлдээ уг явдал улсын хөлбөмбөгийн нэр хүндэд сөргөөр нөлөөлснийг онцолж, уг үйлдлийг спортын үндсэн үнэт зүйлсийг бүрэн зөрчсөн явдал гэж дүгнэв. Харин УЕФА-аас сахилгын шийтгэл хүлээж болзошгүй болсон Хайдук Сплит клуб хөгжөөн дэмжигчдийнхээ зохисгүй авирт уучлалт хүсэж, хариуцлага хүлээхэд бэлэн гэдгээ мэдэгджээ. Энэ тоглолтод Хайдук өрсөлдөгчөө 2-1 харьцаагаар буулган авсан байна.
