Өмнөд Австрали мужийн засгийн газар Рояал Аделаид эмнэлгийн коридорт орхигдон нас барсан Хелен Саржент гэх эмэгтэйн хэрэгт хараат бус, хөндлөнгийн шалгалт хийх шийдвэр гаргалаа. Талийгаачийн гэр бүлийнхэн болон сөрөг хүчнийхэн уг хэрэг явдлыг нарийвчлан шалгахыг олон сарын турш шаардсаны эцэст уг шийдвэр гарсан бөгөөд шалгалтын ажил зургаан сарын дотор эхлэх төлөвтэй байна.
Ар гэрийнхний олж авсан эмнэлгийн хяналтын камерын бичлэгээс үзвэл 64 настай Хелен Саржент 2025 оны аравдугаар сард эмнэлгийн коридорт орон дээр цаг гаруй хараа хяналтгүй хэвтсэнийхээ дараа нас барсан байна. Өмнө нь хийсэн клиникийн гурван шалгалтаар түүний нас баралтыг хонгилд эмчилгээ хийлгэсэнтэй шууд холбоогүй гэж дүгнэж байсан ч ар гэрийнхэн нь бодит үнэнийг тогтоохыг хүссээр иржээ.
Өмнөд Австралийн Эрүүл мэндийн сайд Блэйр Бойер шүүх эмнэлгийн мөрдөн шалгалт хэзээ дуусах нь тодорхойгүй тул хөндлөнгийн шалгалт явуулах саналыг ар гэрийнхэнд нь тавьсан гэдгээ мэдэгдэв. Тэрээр өмнөх шалгалтын дүгнэлтүүд үнэн эсэхийг дахин нягталж, тэдэнд тодорхой хариулт өгөх шаардлагатайг онцолсон юм. Мөн уг шалгалтыг муж улсын эрүүл мэндийн газар болон эмнэлгийн удирдлагаас бүрэн хараат бус хүмүүс удирдана гэж мэдэгдлээ.
Энэхүү шийдвэр нь улсын эмнэлгүүдийн ачаалал ихэссэнтэй холбогдуулан эрүүл мэндийн салбарын үйлдвэрчний эвлэлүүд засгийн газартаа шахалт үзүүлж буй үед гарч байна. Тухайлбал, сувилагч нарын холбоо өвчтөнийг эмнэлгийн коридорт байрлуулахыг бүрмөсөн зогсоохыг шаардсан бол Түргэн тусламжийн ажилтнуудын холбоо түргэний машин эмнэлгийн гадаа дараалалд олон цагаар гацах үзэгдлийг 'аюултай, урьдчилан сэргийлж болох зүйл' хэмээн эсэргүүцжээ.
