Өнгөрсөн есдүгээр сард Сидней хотын хойд хэсэгт 12 настай хүү буудуулж нас барсан хэрэг гарсан билээ. Тус хэрэгт холбогдуулан цагдаагийн байгууллагаас 19 настай залууд хүн амины хэргээр албан ёсоор ял тулгалаа.
Есдүгээр сарын 21-ний өдрийн 17:00 цагийн орчимд Норвест дүүрэг дэх нэгэн орон сууцанд дуудлагаар очсон цагдаа нар нүүр, хүзүүндээ бууны шарх авсан хүүг олсон байна. Яаралтай тусламжийн эмч нар газар дээр нь эмнэлгийн анхны тусламж үзүүлж, улмаар хүүг биеийн байдал нэн хүнд байдалтайгаар эмнэлэгт хүргэсэн боловч гурав хоногийн дараа шархаа даалгүй амьсгал хураажээ.
Хэрэг гарах үед тухайн байранд есөн хүн байсан бөгөөд тэдний дундаас өөр гэмтэж бэртсэн хүн гараагүй талаар цагдаа нар мэдээллээ. Хэргийн газарт ажиллах явцдаа 18 настай гурван залууг саатуулснаас хоёрыг нь мөрдөн шалгах ажиллагаа үргэлжлэх хүртэл сулласан байна. Харин гурав дахь сэжигтнийг Риверстоун хотын цагдаагийн хэлтэст хүргэж, хүнд гэмт хэргийг нуун дарагдуулсан хэрэгт буруутган шалгаж буй аж.
Хэргийг шалгах 'Жанило' тусгай ажлын хэсгийн мөрдөгчид Силвервотер дахь хорих төвд хоригдож байсан, хэрэг гардаг үед 18 настай байсан 19 настай сэжигтнийг баривчилжээ. Уг залууг өнөөдөр Батлан даалтын шүүхийн өмнө шүүгдэгчээр дуудаж, мэдүүлэг авахаар төлөвлөөд байна.
