Их Британийн нисэх онгоцны буудлууд зорчигчдын хил нэвтрэх үйл явцыг хялбаршуулах зорилгоор контактгүй цахим гарцын системийг нэвтрүүлж эхэллээ. Энэхүү шинэ технологи нь аравдугаар сарын 6-наас эхлэн үе шаттайгаар хэрэгжиж, 2027 оны эхэн гэхэд Их Британийн бүх нисэх онгоцны буудлын цахим гарцыг шинэчилнэ.
Шинэ систем нь зорчигчийн зургийг авч, цагаачлал, аялал, паспортын мэдээлэлтэй тулгаж, нүүр царай таних дэвшилтэт технологийг ашиглана. Баталгаажсан мэдээлэлтэй тохиолдолд цахим гарц автоматаар нээгдэж, зорчигч паспортоо уншуулахгүйгээр нэвтрэх боломжтой болно. Хэрэв нэмэлт шалгалт шаардлагатай бол зорчигч паспортоо уншуулах эсвэл Хилийн албаны ажилтанд хандах юм.
Хилийн албаны ерөнхий захирал Фил Дуглас энэ шийдвэрийг 'манай гайхалтай улсад ирж буй аялагчдад ашигтай' хэмээн онцолжээ. Тэрээр 'дэвшилтэт технологийг ашигласнаар бид аяллыг илүү хялбар, хурдан болгож, Их Британийн хилийн аюулгүй байдлыг бүрэн хадгалж байна' гэв. Туршилтаар шинэ контактгүй систем нь паспортоор нэвтрэхээс 25 хувь илүү хурдан болох нь тогтоогдсон байна.
Эхний ээлжинд Ийст Мидландс нисэх онгоцны буудалд Их Британийн иргэдэд зориулж нэвтрүүлж, дараа нь бусад нисэх онгоцны буудлууд болон цахим гарцаар нэвтрэх эрхтэй бусад орны иргэдэд үйлчилж эхэлнэ. Энэхүү өөрчлөлт нь Засгийн газрын Их Британийн хилийг орчин үеийн болгох, Цахим Аяллын Зөвшөөрөл (ETA) зэрэг бусад шинэчлэлүүдийн үргэлжлэл юм. Мөн энэ нь хууль бус цагаачлалтай тэмцэх, хилийн хяналтыг сайжруулах өргөн хүрээний арга хэмжээний нэг хэсэг болж байна.
