Бразилын ерөнхийлөгчийн сонгуульд өнгөрсөн сард ялагдсан хэт барууны үзэлтэй улс төрч Флавио Болсонару АНУ руу зугтан очсоныхоо дараа улс төрийн нөлөөгөө хадгалахаар хичээж байна. Тэрбээр аравдугаар сарын 25-ны сонгуулиар одоогийн ерөнхийлөгч, зүүний жигүүрийн Луис Инасио Лула да Силвад 4 сая гаруй саналын зөрүүгээр ялагдсан юм. Үүнийхээ дараахан буюу өнгөрсөн долоо хоногийн эхээр тэрбээр эх орноо орхин явжээ.
Пүрэв гарагийн орой 45 настай Болсонару АНУ-д ирснээсээ хойш анх удаа олон нийтийн өмнө гарч, Дональд Трампын Мар-а-Лаго эдлэнд болсон 'Консерватив улс төрийн үйл ажиллагааны бага хурал' (CPAC)-ын гала оройн зоог дээр үг хэлэв. Их Британийн ерөнхий сайд асан Лиз Трасс оролцохоор төлөвлөгдсөн уг арга хэмжээний үеэр тэрбээр Бразил болон АНУ-ын хувьд 'бүх зүйл ингээд дуусаагүй', цаашид агуу үйл явдлууд хүлээж байгааг онцолсон байна.
Үүнээс өмнө Болсонару сонгуулийн дараах анхны ярилцлагадаа санал хураалт луйвартай болсон тухай ямар ч нотолгоогүй үндэслэлүүдийг дурдаад, эх орноосоо зугтахад нь хэн ч туслаагүй хэмээн мэдэгджээ. 'The New York Times' сонинд өгсөн ярилцлагадаа тэрбээр бүхнийг бие даан зохион байгуулсан гэсэн нь Трампын зөвлөх Жейсон Миллер болон Аргентины ерөнхийлөгч Хавьер Милейн туслах Сантьяго Капуто нар тусалсан гэх мэдээллийг няцааж буй хэрэг болов.
Эх орондоо мөнгө угаасан, авлига авсан хэргээр холбооны цагдаагийн газарт шалгагдаж байгаа Болсонару зугтсан түүхээ 'булшиндаа авч орно' хэмээн ярьжээ. Конгрессын гишүүнээр 20 гаруй жил ажилласан түүний бүрэн эрхийн хугацаа ирэх оны эхээр дуусмагц парламентын халдашгүй эрх нь цуцлагдаж, эрүүгийн хариуцлага татагдах эрсдэл нүүрлээд байна. Бразилын шинжээчид 59 сая санал авсан нэр дэвшигч ийнхүү улсаа орхин явснаараа сөрөг хүчний удирдагчийн байр сууриа алдаж, өөрийн улс төрийн замыг үгүй хийлээ хэмээн дүгнэв.
Түүний ах, конгрессын гишүүн асан Эдуардо Болсонару мөн АНУ-д орогнон амьдарч байгаа бөгөөд эх орондоо буцвал дарамт шахалтын хэргээр дөрвөн жилийн хорих ял эдлэх нөхцөлтэй тулгараад буй юм. Хэдийгээр тус гэр бүлийн дөрвөн гишүүн өнгөрсөн сард конгресст сонгогдсон ч тэдний эцэг, ерөнхийлөгч асан Жаир Болсонару 2022 оны сонгуулийн дараа төрийн эргэлт хийхийг завдсан хэргээр 27 жилийн хорих ял сонсож, гэрийн хорионд байгаагаас гадна 2060 он хүртэл төрийн албанд нэр дэвших эрхгүй болжээ.
Гэр бүлийн гол гишүүд нь хилийн чанадад дүрвэж, зарим нь хоригдсон тул тэдний нэрээр нэрлэгдсэн улс төрийн популист хөдөлгөөн уналтад орсныг ажиглагчид анхааруулж байна. Улс төр судлаач Сержио Абранчес хэт барууны уг хөдөлгөөн алдаа, гэмт үйлдлээсээ болж хүнд цохилтод орсон бөгөөд 2030 оны ерөнхийлөгчийн сонгуулиас өмнө ардчилсан барууны хүчнүүд тэднээс салж, бие даасан замаар явах боломж бүрдэж буйг онцолжээ.
Трампын дэмжлэгээр АНУ-ын виз авсан Флавио Болсонару ирээдүйд сонгуульд дахин өрсөлдөхөө зарласан ч 'ядаж одоохондоо' АНУ-д амьдарна гэдгээ илэрхийлэв. Харин түүний ах Эдуардо өөрсдийгөө хижаб өмсөхөөс татгалзан амь насаа алдахаас эмээн зугтаж буй орогнол хүсэгч эмэгтэйн хувь заяатай зүйрлээд, АНУ-д бүрэн хууль ёсоор оршин сууж байгаагаа цахим бичлэгээрээ дамжуулан мэдэгдсэн байна.
