Их Британийн Сангийн сайд улсын төсвийг танилцуулахдаа асаргааны тэтгэмжийн тогтолцоонд цахим шаталсан шинэ систем нэвтрүүлэх тухай зарлахаар төлөвлөж байна. Энэхүү шинэчлэл нь олон зуун мянган асран хамгаалагчийг санхүүгийн хүнд цохилтод оруулж байсан орлогын хатуу босго буюу 'cliff edge' дүрмийг халж байгаа хэрэг юм. Гэсэн хэдий ч өмнө нь шударга бусаар илүү төлбөрт унасан иргэд өрөө бүрэн буцаан төлөх шаардлага хэвээр үлдэж буйд олон хүн бухимдаж байна.
Өнөөгийн дүрмээр Их Британид хөдөлмөрийн чадваргүй болон өвчтэй ар гэрийнхнээ асарч буй иргэд долоо хоногт 204 фунт стерлингээс илүү орлого олбол тухайн долоо хоногийн 86.45 фунт стерлингийн тэтгэмжийг бүхэлд нь алддаг журамтай. Асран хамгаалагч энэхүү заасан хязгаарыг ердөө ганц пеннигээр хэтрүүлбэл бүтэн жилд 52 пенни болж, улмаар 4,495.40 фунт стерлингийг засгийн газарт буцаан төлөх шийтгэл хүлээдэг байв. Энэхүү шударга бус удирдлага, зохион байгуулалт нь олон нийтийн дунд асаргааны тэтгэмжийн дуулиан болж танил болсон юм.
Аутизмтай хүүгээ асарч буй Гай Шахар болон түүний эхнэр Оксана нарт таван жилийн хугацаанд орлогын босгыг ялимгүй хэтрүүлсний төлөө 10,000 фунт стерлингийн өрийн нэхэмжлэл иржээ. Оксана цагийн ажил хийх явцдаа долоо хоногт дунджаар ердөө 1.92 фунт стерлинг, зарим долоо хоногт ердөө 38 пенни илүү орлого олсон байв. Ийнхүү нийт 505 фунт стерлингийн орлого илүү олсныхоо төлөө 10,130.45 фунт стерлингийн өр болон 50 фунт стерлингийн торгууль төлөх болж, уг асуудлаар шүүхэд гомдол гаргаад байна.
Түүнчлэн шинэ цахим шаталсан систем 2030 оноос нааш бүрэн хэрэгжих боломжгүй байгаа нь иргэдийн шүүмжлэлийг дагууллаа. Хөгжлийн бэрхшээлтэй хүүгээ асарч байгаад орлогын босгыг санамсаргүй зөрчиж, 1,623 фунт стерлингийн торгууль хүлээсэн багш асан Элизабет Тэйт техникийн өндөр хөгжилтэй өнөө үед системийг хэрэгжүүлэхэд олон жил зарцуулахаар байгааг шүүмжилсэн байна. Тэрээр асаргааны тэтгэмжийг өөрчлөх явдал нь Английн нийгмийн халамжийн бүтцийг үүрч буй төлбөргүй асран хамгаалагчдын бодит үүрэг оролцоог бүхэлд нь үнэлэх эхлэл байх ёстойг онцлов.
Ээжийгээ олон жил асарсан Андреа Такер гэгч эмэгтэй 2025 оны хоёрдугаар сард шүүхэд хандан 4,600 фунт стерлингийн нэхэмжлэлийг амжилттай цуцлуулсан цөөн асран хамгаалагчийн нэг болсон байна. Их Британийн Хөдөлмөр, тэтгэврийн яам түүний жилийн дундаж орлогыг тооцохдоо хууль зөрчсөн болох нь шүүхээр тогтоогджээ. Такер энэхүү харгис дүрмийн золиос болсон иргэдийн өрийг бүрмөсөн хэрэгсэхгүй болгож, урьд төлсөн мөнгийг нь нөхөн олгох шаардлагатайг сануулав.
Их Британийн Хөдөлмөр, тэтгэврийн яам асран хамгаалагчдын итгэлийг эргүүлэн олж авахад маш их хугацаа шаардагдахаар байна. Хатуу тогтолцоо дахин дөрвөн жил үргэлжлэх тул цаашид ч олон асран хамгаалагч санамсаргүй байдлаар өрөнд унах эрсдэлтэй хэвээр үлдлээ.
