Казахстан болон Австри улсууд тээврийн дэд бүтэц, эрчим хүч, газрын тос, химийн үйлдвэрлэл болон чухал түүхий эдийн салбарт худалдаа, хөрөнгө оруулалтын түншлэлээ бэхжүүлэхээр зорьж байна. Энэ хүрээнд Бүгд Найрамдах Казахстан Улсын Гадаад хэргийн сайд Мухтар Тлеуберди арваннэгдүгээр сарын 14-нд Австрийн Эдийн засаг, эрчим хүч, аялал жуулчлалын яамны Ерөнхий нарийн бичгийн дарга Северин Грубертэй албан ёсны уулзалт хийлээ.
Уулзалтад Австрийн томоохон компаниуд болон төрийн өмчит хувьцаат компаниудын төлөөлөл, түүний дотор 'OMV', 'ÖBAG' зэрэг байгууллагууд оролцов. Талууд арваннэгдүгээр сарын 19-20-ны өдрүүдэд Вена хотноо зохион байгуулах Худалдаа, эдийн засгийн хамтын ажиллагааны Засгийн газар хоорондын комиссын 13 дугаар хуралдаан болон Бизнесийн зөвлөлийн 11 дүгээр уулзалтын бэлтгэл ажлын талаар хэлэлцжээ.
Казахстаны Гадаад хэргийн сайд М.Тлеуберди улс орныхоо дэд бүтэц, аж үйлдвэр, эрчим хүчний салбарыг шинэчлэх төлөвлөгөөг танилцуулсан байна. Ялангуяа 'Дундах коридор' буюу Каспийн тэнгис дамнасан олон улсын тээврийн чиглэлийг хөгжүүлж, Европ болон Азийг холбосон дамжин өнгөрөх тээврийн боломжийг сайжруулахад гол анхаарлаа хандуулав. Түүнчлэн Европын Холбооны 'Global Gateway' стратеги болон Австри, Казахстаны холболтын платформоор дамжуулан хамтарсан төслүүд хэрэгжүүлэх боломжтойг онцоллоо.
Австрийн талыг төлөөлөн С.Грубер тус улсын бизнес эрхлэгчид Казахстанд үйл ажиллагаагаа өргөжүүлэх сонирхолтой байгааг нотолсон юм. Мөн эрчим хүч, машин үйлдвэрлэл, хөдөө аж ахуй, аялал жуулчлалын салбарт хөрөнгө оруулалтыг эрчимжүүлэхийг уриалав. Талууд дотоодын үйлдвэрлэлийг нутагшуулах, сэргээгдэх эрчим хүч, түүхий эдийн бус экспорт болон чухал ашигт малтмалын чиглэлд хоёр талын эдийн засгийн харилцааг шинэ шатанд гаргахаар тохиролцлоо.
