Италийн авто уралдаанч Кими Антонелли ням гарагт болсон Мексикийн Гран При тэмцээнд гуравдугаар байр эзэлснээр 20 нас 68 хоногтойдоо Формула 1-ийн түүхэн дэх хамгийн залуу дэлхийн аварга болов. Түүний өмнө Макс Ферстаппен тэргүүлж, Льюис Хэмилтон хоёрдугаар байрт шалгарсан юм. Ингэснээр Антонелли 2010 онд 23 насандаа аваргалж байсан Германы Себастьян Феттелийн дээд амжилтыг эвдсэн бөгөөд 1953 оноос хойш уг цолыг хүртсэн анхны итали нисгэгчээр тодорлоо.
Уралдааны дараа сэтгэгдлээ хуваалцахдаа тэрбээр сэтгэл нь маш их хөдөлж, үг ч хэлж чадахгүй байснаа онцолжээ. Залуу нисгэгч машинаасаа буухад гэр бүл болон багийн хамт олон нь халуун дотноор хүлээн авч баяр хүргэсэн байна. Антонелли сүүлийн тойрогт аварга болсноо ухамсарлах мөчид сэтгэл нь ихээхэн догдолж, зам дээр бараг хоёр секунд алдсанаа дурдаад энэ нь түүний хамгийн том мөрөөдөл биелсэн онцгой агшин байсныг өгүүлэв.
Мексикийн гарааг дөрөвдүгээр байрнаас эхлүүлсэн тэрбээр дэлхийн аварга цолыг баталгаажуулахын тулд хамгийн багадаа есдүгээр байрт ороход л хангалттай байсан юм. Уралдааны 45 дахь тойрогт Валттери Боттас осолдож улаан туг өргөсөн ч Антонелли уралдааныг тогтвортой дуусгаж чадав. Энэ үр дүнгээр тэрбээр 380 оноотой болж, улирал өндөрлөхөд дөрвөн гараа дутуу байхад бусаддаа гүйцэгдэхээргүй боллоо. Харин тус гараанд зургаа дахь ялалтаа байгуулсан Макс Ферстаппен 261 оноотой болж, 259 оноотой Льюис Хэмилтоны өмнө бичигдсэнээр тэд удаах байрын төлөө өрсөлдөхөөр үлдэв.
Формула 1-ийн цуврал цаашид Бразил, Лас Вегасын замаар үргэлжлэх хуваарьтай байна. Улирлын сүүлийн хоёр уралдаан Катар болон Абу Дабид болохоор төлөвлөгдсөн ч тухайн бүс нутгийн геополитикийн нөхцөл байдлаас шалтгаалан зохион байгуулагдах эсэх нь тодорхойгүй байна.
