БНСУ-ын Ерөнхийлөгч И Жэ Мён Засгийн газрын хуралдааны шууд дамжуулалтыг зогсоох тухай саналыг эсэргүүцэж буйгаа 10 дугаар сарын 18-ны ням гарагт дахин нотлов. Тэрбээр хуралдааны явцад яригдсан аливаа санал бодол, шүүмжлэлд нээлттэй хандахаа илэрхийллээ.
Ерөнхийлөгч үүнээс өмнө X хуудсаараа дамжуулан хуралдааны бичлэгийг олон нийтэд хүргэхээ болих шаардлагагүй гэж мэдэгдсэн юм. Түүнчлэн сайд нарын зүгээс шууд дамжуулалтыг зогсоохыг шаардсан гэх сүүлийн үеийн хэвлэлийн мэдээллийг тэрбээр үндэслэлгүй ташаа мэдээлэл хэмээн нэрлэв.
Тэрбээр цахим хуудсандаа нийтэлсэн мэдэгдэлдээ сайд нар хуралдаан нээлттэй болж байгаагаас үүдэн үзэл бодлоо чөлөөтэй илэрхийлж чадахгүй байна гэх худал шалтаг зааж, хуралдааныг хаалттай явуулахыг шахаж буйг ойлгоход бэрх байна гэжээ. Мөн ийм шаардлагыг няцаасан YouTube бичлэгийг хуваалцаж, сайд нарынхаа сөрөг байр суурийг хэрхэн хүлээн авдаг жишээгээ танилцуулсан байна.
Төрийн үйл хэрэгтэй холбоотой олон талын санал бодлыг сонсох зорилгоор хуралд оролцогчдын тоог зориуд мэдэгдэхүйц нэмэгдүүлсэн гэдгээ И Жэ Мён онцлов. Түүнчлэн тэрбээр аливаа мэтгэлцээнд дуртай бөгөөд сөрөг байр суурьтай хүмүүсийг ямагт хүндэтгэж, байгууллага доторх алдаа дутагдлаас сэргийлэхэд шүүмжлэгчдийн үүрэг чухал болохыг үргэлж сануулдаг гэдгээ дурдлаа.
Ерөнхийлөгч И Жэ Мён 2026 оны есдүгээр сарын 29-ний өдөр Хөх ордонд Засгийн газрын хуралдааныг даргалан явуулж байсан бол улмаар 2026 оны 10 дугаар сарын 13-ны хуралдаанд мөн оролцож үг хэлсэн юм. Тэрбээр төрийн бодлогын хэлэлцүүлгийг олон нийтэд ил тод байлгах зарчмаа үргэлжлүүлэн баримталсаар байна.
