Мексикийн шүүх Австралийн хоёр ах дүү болон тэдний америк найзын амийг хөнөөсөн гурван этгээдэд тус бүр 158 жил, есөн сарын хорих ял оноолоо. Шүүгдэгчдийг хүн амины хэрэг, хүндрүүлэх нөхцөлтэй дээрэм, хүчирхийлэл үйлдэж тээврийн хэрэгсэл дээрэмдсэн гэм буруутайд тооцсон байна. Хохирогчид болох Австралийн иргэн Жейк, Каллум Робинсон нар Америкийн иргэн Картер Роудын хамт 2024 онд Баха Калифорни мужид серфингээр хичээллэж яваад амиа алджээ.
Залуус 2024 оны дөрөвдүгээр сарын 27-нд Энсенада хотын ойролцоох эзгүй далайн эрэгт майхантай хоноглож байхдаа халдлагад өртсөн түүхтэй. Халдлага гарсанаас хэд хоногийн дараа тэдний цогцсыг хадан хясаан дээр байрлах худаг дотроос толгойдоо буудуулсан шархтай байдалтайгаар олжээ. Хэрэгт сэжиглэгдсэн 'Эль Кекас' хочит Хесус Герардо гэгч халдлагыг удирдсан бол түүнтэй хамт Иринео Франсиско, Анхел Хесус нар уг хэрэгт ял шийтгүүлэв.
Прокурорууд шүүгдэгчдээс 100,000 гаруй ам.долларын нөхөн төлбөр шаардсан боловч шүүгч үүнийг иргэний журмаар шийдвэрлэх ёстой гэж үзэн татгалзжээ. Амиа алдсан ах дүүсийн эцэг эх Мартин, Дебра Робинсон нар есдүгээр сарын 7-нд эхэлсэн шүүх хуралд биечлэн оролцохоор Австралиас ирсэн байна. Тэд хөвгүүдийнхээ гэгээн дурсгалыг хүндэтгэх зорилгоор тусгай сан байгуулж, нийгэмд тустай үйлсийг нь үргэлжлүүлэхээр шийджээ.
Мексикийн Баха Калифорни муж нь зохион байгуулалттай гэмт хэрэг, хар тамхины наймаагаар алдартай, аюултай бүс нутгуудын нэгт тооцогддог. Тус улсын Номхон далайн эрэг орчмоор аялж байсан гадаадын иргэд гэмт хэрэгт өртөж амиа алдсан тохиолдол урьд нь мөн гарч байв. Тухайлбал, 2015 онд Австралийн серфингч Дин Лукас, Адам Коулман нар Синалоа мужид аялж явахдаа гэмт халдлагад өртөн шатаагдсан харамсалтай явдал гарч байжээ.
