АНУ-ын Зэвсэгт хүчний командлагч генерал Ксавьер Брунсон Өмнөд Солонгос даяар цэргийн сургуулилалтыг газар зүйн хувьд тархаан явуулах шаардлагатайг Вашингтонд 10 дугаар сарын 12-ны өдөр болсон АНУ-ын Армийн нийгэмлэгийн бага хурлын үеэр мэдэгдлээ.
Холбоотнууд жил бүр удирдах төвүүдэд голлон явуулдаг томоохон сургуулилалтын хэлбэрээс татгалзах хэрэгтэйг тэрбээр цохон тэмдэглэв. Түүнчлэн Чежү арлаас хойд нутгийн Кёнги муж хүртэлх хойгийн нийт газар нутгийг хамарсан хамтарсан бэлтгэл сургуулилалтыг өргөн хүрээнд хийх саналыг албаны хүн танилцууллаа.
Украины дайнд нисгэгчгүй нисэх төхөөрөмж зэрэг орчин үеийн зэвсгийг өргөнөөр ашиглаж буй нь байнгын нэг байрлалд бөөгнөрсөн хүчийг ихээхэн эмзэг болгож байгааг Брунсон дурдсан юм. Иймээс болзошгүй халдлагаас сэргийлж цэргийн анги нэгтгэлүүдийг олон цэгт тараан байршуулах замаар хохирол амсах эрсдэлийг бууруулах ёстойг тэрбээр сануулав.
АНУ-ын цэргийн баг хямралын үед Өмнөд Солонгосын нутаг дэвсгэрт хэрхэн маневр хийх боломжийг судлах зорилгоор цэрэг оролцуулаагүй стратегийн тусгай сургуулилалтыг нисдэг тэргээр амжилттай хийсэн байна. Мөн жил бүрийн хоёр том сургуулилалтын завсраар тогтмол бэлтгэл явуулах боломжийг эрэлхийлж эхэлжээ.
Украины дайнд оролцож буй Умард Солонгосын цэргүүд бодит байлдааны туршлагыг өөрсдийн бэлтгэл, зэвсэг хөгжүүлэлтийн хөтөлбөрт нэвтрүүлж байгаад Брунсон онцгойлон сэрэмжлүүлэв. Дайсан этгээд бодит байлдаанд бэлтгэгдэж буй тул холбоотнууд үүнийг сөрөн зогсох арга замаа түргэн хугацаанд боловсруулах шаардлага тулгараад байна.
Өмнө нь 2026 оны 9 дүгээр сарын 17-нд АНУ тусгаар тогтносны 250 жилийн ойд зориулан Сөүл хотод зохион байгуулсан хүлээн авалтад генерал Брунсон оролцож үг хэлж байжээ.
