Баасан, бямба гарагийн орой Их Британийн тэнгэрт хойд туйлын туяа буюу аврора бореалис тод харагдаж, иргэдийг баярлууллаа. Энэхүү байгалийн үзэгдэл ихэвчлэн Арктикийн тойрог болон Шотландын хойд хэсэгт харагддаг ч энэ удаад Девон, Хэмпшир, Кент зэрэг өмнөд нутгуудад ч тод харагдсан юм.
Цаг уурын албаны мэдээлснээр, тэнгэр цэлмэг байвал мягмар гараг хүртэл туяа харагдах боломжтой. Хойд туйлын туяа нь нарны идэвхжил, геомагнитын шуурга дэлхийн дээд агаар мандалтай харилцан үйлчлэх үед үүсдэг байгалийн гэрлийн үзэгдэл юм.
Цэнэгт бөөмс дэлхийн соронзон туйлуудын орчимд агаар мандал дахь хийтэй мөргөлдөхөд аврора үүсдэг. Мөргөлдөх үед янз бүрийн долгионы урттай гэрэл ялгарч, тэнгэрт өнгөлөг үзэгдлийг бий болгодог. Хүчилтөрөгч нь ногоон, өндөрлөг газарт ховор улаан туяаг үүсгэдэг бол азот нь цэнхэр, нил ягаан өнгийг бий болгодог байна.
Цаг уурын албаны тайлбарласнаар, нар нь цагт нэг сая миль хурдтай хөдөлдөг нарны салхи гэгддэг цэнэгт бөөмсийг ялгаруулдаг. Эдгээр бөөмс дэлхийн соронзон оронтой харилцан үйлчлэх үед соронзон туйлууд руу чиглэгддэг. Ингэж эрчим хүчтэй бөөмс дээд агаар мандал дахь хийтэй мөргөлдөхдөө гэрлийн хэлбэрээр энерги ялгаруулдаг.
Өнгөрсөн жил мэргэжилтнүүд нарны 11 жилийн байгалийн мөчлөгийн идэвхжил нэмэгдэж байгаатай холбогдуулан 2026 онд хойд туйлын туяаг харах хамгийн тохиромжтой жил болно гэж мэдэгдсэн.
