Чех улсад залуучуудад жирэмслэлтээс хамгаалах хэрэгслийг улсын зардлаар олгох тухай асуудал улс төрийн хүрээнд дахин хөндөгдөж эхэллээ. ОДС намын гишүүн Ева Декруа энэ асуудлыг олон нийтийн сүлжээнд хөндсөнөөр маргаан өрнөсөн юм. Тэрээр эрүүл мэндийн даатгалаар жирэмслэлтээс хамгаалах хэрэгслийг олгох нь хүсээгүй жирэмслэлтээс урьдчилан сэргийлж, үр хөндөлтийн тоог бууруулах ач холбогдолтойг онцолжээ. Декруагийн санал болгосноор эхний ээлжинд залуу эмэгтэйчүүд болон оюутнуудад энэ үйлчилгээг чиглүүлж, жирэмслэлтээс хамгаалах хэрэгслийн санхүүгийн бэрхшээлийг шийдвэрлэх боломжтойг дурдсан байна. Тэрээр ‘Ихэнх үр хөндөлт нэг болон түүнээс дээш хүүхэдтэй эмэгтэйчүүдэд хийгддэгийг та мэдэх үү? Хүмүүсийн 84 хувь нь эмэгтэйчүүдийн жирэмслэлтийн талаар өөрсдөө шийдвэр гаргах эрхийг дэмждэгийг та мэдэх үү? Би жирэмслэлтээс хамгаалах хэрэгслийг, ядаж эхний ээлжинд залуу охид, оюутнуудад улсын эрүүл мэндийн даатгалаар хамруулах ёстой гэж үзэж байна’ хэмээн Фэйсбүүктээ бичжээ. Одоогийн байдлаар Чех эмэгтэйчүүд эмнэлгийн шалтгаанаар заагаагүй бол жирэмслэлтээс хамгаалах хэрэгслийн төлбөрийг өөрсдөө төлдөг бөгөөд гурван сарын хэрэглээний үнэ дунджаар 400 CZK-аас эхэлдэг. Amnesty International Чех улсад жирэмслэлтээс хамгаалах хэрэгслийг улсын эрүүл мэндийн даатгалд хамруулахыг удаан хугацаанд уриалж ирсэн. Эрүүл мэндийн сайд зорилтот дэмжлэг үзүүлэхэд нээлттэй байгаагаа илэрхийлжээ.
Зургийн эх сурвалж: https://praguemorning.cz/free-contraception-czechia/
Залууст үнэгүй жирэмслэлтээс хамгаалах хэрэгсэл олгох нь Чехэд маргаан үүсгэв
