Их Британийн давж заалдах шатны шүүх хүний наймааны дүрэм журмын дагуу мөнгө нэхэн хулгайлагдсан явдлыг 'мөлжлөг' гэж үзэхгүй гэсэн Их Британийн Дотоод хэргийн яамны тайлбарыг няцаасан шийдвэр гаргалаа. Өмнө нь тус яам зөвхөн албадан хөдөлмөр эрхлүүлсэн тохиолдлыг хүний наймааны хохирогчид тооцож, барьцаалагдсан иргэдийг хасдаг байсан юм. Шүүхийн энэ шийдвэр гарсанаар барьцаанд тарчилсан олон зуун орогнол хүсэгчийн хэргийг дахин хянаж, тэдэнд нөхөн сэргээх болон дэмжлэг үзүүлэх эрх зүйн орчин бүрдэв.
Европыг зорин Ливи улсаар дамжин өнгөрдөг Судан, Эритрей болон Ойрх Дорнодын дайн самуунаас зугтсан орогнол хүсэгчдийн хувьд барьцаалагдах эрсдэл түгээмэл тулгардаг. Уг маргааныг Их Британид орогнол хүссэн 25 настай Сири залуугийн гомдлоор шүүхэд шилжүүлжээ. Тэрбээр 2021 оны долдугаар сард цэрэгт албадан татагдахаас зугтаж, тулалдахаас татгалзвал шоронд тарчлаан тамлагдахаа мэдээд эх орноо орхин Их Британи руу хүрэх зорилгоор Ливид очсон байна.
Гэвч тэрбээр бусад сири иргэдийн хамт зэвсэгт этгээдүүдэд хулгайлагдан 2021 оны найм болон есдүгээр сарын хооронд бүтэн нэг сар хоригджээ. Зэвсэгт бүлэглэлийнхэн тэдний мөнгө, утсыг дээрэмдэн, хоол хүнс, ус багатай цөл дундуур 24 цагийн турш зэвсгээр сүрдүүлэн авч явсан аж. Барьцаалагчид ар гэрийнхнээс нь хэдэн мянган ам.доллар нэхэж, мөнгөө өгөх хүртэл суллахгүй гэдгээ мэдэгдэн гар, хөлийг нь хүлж, зодон тарчлааж байв. Мөн гэрийнхэнтэйгээ утсаар холбогдож мөнгө гуйх үед нь хашхирах дууг сонсгохын тулд дэргэд нь балбадаг байсан бөгөөд хохирогч өөрийн эд эрхтнийг худалдахаас туйлын их айж байснаа ярьжээ.
Гэр бүл нь барьцааны мөнгийг төлсний дараа залуу суллагдаж, Ливиэс Итали руу Газар дундын тэнгисийг завиар гатлан Европыг зорьсон байна. Тэрбээр Францаас Ла-Маншийн хоолойг нэвтрэн 2022 оны тавдугаар сарын 16-нд Их Британид хүрч, орогнол хүсчээ. Гэвч Их Британийн Дотоод хэргийн яам түүнийг албадан хөдөлмөр эрхлээгүй гэх шалтгаанаар хүний наймааны хохирогч гэж тооцохоос татгалзсан тул тэрбээр дээд шүүхэд хандан ялсан бөгөөд Дотоод хэргийн сайд Шабана Махмуд уг шийдвэрийг эсэргүүцэн давж заалдаад байсан юм.
Сүүлийн үеийн мэдээллийн эрх чөлөөний баримтаас үзвэл 2024 оны долдугаар сараас 2025 оны долдугаар сарын хооронд хүний наймааны хохирогч гэж албан ёсоор хүлээн зөвшөөрөгдсөн 1,778 орогнол хүсэгчийн 89 хувийг Их Британиас албадан гаргасан байна. Энэ нь тэднийг дахин хүний наймаанд өртөх эрсдэлд оруулж байсныг эрх хамгаалагчид шүүмжилсээр ирсэн юм. Шүүгчдийн бүрэлдэхүүн Дотоод хэргийн сайдыг барьцаалан хулгайлах үйл явц мөлжлөг мөн эсэхийг нухацтай авч үзээгүй нь алдаа болсон хэмээн дүгнэжээ.
Сири залуугийн өмгөөлөгч Жереми Блүүм энэхүү шийдвэрийг талархан хүлээн авч, үйлчлүүлэгч нь хүний наймааны хохирогч мөн болохыг шүүх баталсныг онцлов. Тэрбээр цаашид ижил нөхцөлд хохирсон хүмүүс үндэсний хяналтын механизмын хүрээнд дахин хүсэлт гаргаж, сэтгэл зүйн болон амьдрах эрхийн тусламж авах боломж бүрдлээ хэмээн найдаж буйгаа илэрхийллээ. Харин Дотоод хэргийн яамны хэвлэлийн төлөөлөгч хууль ёсны үйл ажиллагааны явцыг шууд тайлбарлахаас татгалзаж, орогнол олгох, цагаачлалын замыг тодорхой, шударга болгох ажлыг үргэлжлүүлнэ гэж мэдэгдэв.
