ОХУ өвлийн улирал эхлэхээс урьтан Украины эрчим хүчний дэд бүтцэд хийх дайралтаа эрчимжүүлж, цахилгаан болон дулааны хангамжийг таслахыг хичээж байгааг Украины ерөнхийлөгч Володимир Зеленский бямба гарагт мэдэгдлээ. Нийслэл Киев болон бусад бүс нутаг дахь иргэний зориулалттай байгууламжууд цохилтод өртөж байгаа нь тус улсыг амьдрах аргагүй болгох зорилготой гэж ажиглагчид үзэж байна.
Энэ удаагийн халдлага нь 2022 оны хоёрдугаар сард бүрэн хэмжээний түрэмгийлэл эхэлснээс хойш эрчим хүчний салбарт хийсэн хамгийн өргөн цар хүрээтэй цохилтуудын нэг болсныг Зеленский цахим сүлжээнд тэмдэглэжээ. Түүний мэдээлснээр эрчим хүч үйлдвэрлэх болон түгээх 15 гаруй чухал байгууламж онилогдсон бөгөөд одоогоор сэргээн засварлах ажлыг шуурхай албад боломжит бүх нөөцөөрөө гүйцэтгэж байна. Орос улс энэ өвөл сая сая хүнийг хүйтэнд хөлдөөж, эрчим хүчний сүлжээг бүрэн унтраахаар чармайж буй тул холбоотнуудаа Кремльд шахалт үзүүлэхийг тэрбээр уриаллаа.
Нөгөө талд ОХУ-ын Батлан хамгаалах яам баруун хойд нутгийн Житомир хотын цахилгааны дэд станц болон дэд бүтцийн хэд хэдэн цэгт цохилт өгснөө батлав. Үүнээс гадна цэргийн аж үйлдвэрийн цогцолборыг бүтээгдэхүүнээр хангадаг гэх үндэслэлээр Кривой Рог хотын гангийн томоохон үйлдвэр, фронтын шугамтай ойр байрлах Запорожье дахь үйлдвэрийг довтолсноо мэдэгдсэн юм. Украины өмнөд хэсгийн Херсон хотод болсон агаарын дайралтын улмаас түргэн тусламжийн жолооч амиа алдаж, хүүхэд зэрэг 19 хүн шархаджээ. Харин Оросын ТАСС агентлаг Белгород мужид Украины дроны улмаас нэг эмэгтэй амиа алдаж, нэг хүн шархадсан тухай мэдээлэв.
Үүний зэрэгцээ АНУ-ын ерөнхийлөгч Дональд Трамп Оросын эсрэг хэрэгжүүлэх гэж байсан шинэ хориг арга хэмжээний багцыг цуцалсныг Зеленский шүүмжлэв. Тэрбээр хоригийг сулруулж, дарамтыг багасгасан нь Оросын удирдагч Владимир Путинд цаашид дайралтаа үргэлжлүүлэх урам зориг өгч байна хэмээн байр сууриа илэрхийлжээ. Трамп эрчим хүчний орлогод чиглэсэн өргөн хүрээтэй хориг, тариф мөрдөгдөж эхлэхээс хоёр хоногийн өмнө зарлиг гарган цуцалсан бөгөөд Москвагийн албаны төлөөлөгч Кирилл Дмитриев уг шийдвэрийг түүхэн ач холбогдолтой алхам хэмээн сайшаасан байна.
