Австралийн Викториа мужийн баруун бүсэд орших Ставелл хотод гарсан дээрэм, танхайн хэргийн улмаас гудамжинд хяналтын камер байршуулах тухай шаардлага иргэдийн дунд хүчтэй өрнөж байна. Хэрэг аравдугаар сарын 5-ны 17:45 цагийн орчимд Уэйкхэм болон Дойл гудамжны уулзварт гарсан бөгөөд олон нийтийн сүлжээнд тархсан дүрс бичлэгт хэд хэдэн өсвөр насны хүүхэд нэгэн хүү рүү дайрч буй нь тодорхой бичигджээ.
Цагдаагийн байгууллагын мэдээлснээр, хэсэг бүлэг өсвөр насныхан 15 настай хүүг зодож, гутал, хувцсыг нь дээрэмдэн зугтсан байна. Хохирогч хүү эмнэлэгт яаралтай тусламж аваад гарсан бөгөөд мөрдөгчид мөрдөн шалгах ажиллагааны явцад 14 болон 15 настай гурван хөвгүүнийг баривчилжээ. Тэдэнд бүлэглэн зодоон хийсэн, дээрэм үйлдсэн, санаатайгаар гэмтэл учруулсан болон хулгайн зүйл ангиар ял төлөвлөн хүүхдийн шүүхэд шилжүүлэхээр болсон бөгөөд цаашид дахин баривчилгаа хийгдэж болзошгүй байна.
6,000 гаруй оршин суугчтай тус хотод энэ үйл явдлаас өмнө ч хяналтын камер шаардсан иргэдийн давалгаа олон сарын турш өрнөж байжээ. Иргэд гэмт хэрэг олноор гардаг эрсдэлт цэгүүдэд камер суурилуулахыг Нортерн Грампианс Шире зөвлөлөөс удаа дараа хүссэн ч захиргааны байрны гаднахаас бусад нийтийн бүсэд хувийн нууцыг хамгаалах шалтгаанаар татгалзсаар ирсэн аж.
Хотын дарга Карен Хислэп олон нийтийн шүүмжлэлд хариу өгөхдөө хяналтын камер авч суурилуулах, арчлан хамгаалах зардал маш өндөр байдгийг тайлбарлав. Бүх эрсдэлт цэгүүдэд камер байршуулахад орон нутгийн төсвөөс хэдэн зуун мянган доллар шаардагдах бөгөөд татварын хязгаартай нөхцөлд санхүүгийн тогтвортой байдлаа хадгалахын төлөө ажиллаж буйг тэрээр онцолсон юм. Гэсэн хэдий ч орон нутгийн удирдлага олон нийтийн аюулгүй байдлыг цагдаагийн байгууллагатай хамтран хангах үүрэгтэй тул тэргүүлэх чиглэлээ дахин нягталж үзэж болохыг үгүйсгээгүй байна.
Нөгөө талд нутгийн оршин суугч эмэгтэйчүүд энэ оны эхээр 300 гаруй хүний санал асуулга явуулж, төв гудамж, спортын талбай, скэйт паркт камер суулгахыг хүссэн баримтыг цуглуулжээ. Санал асуулгыг санаачилсан Жессика Лийс зөвлөлийг зардлаар шалтаглахын оронд муж улсын засгийн газраас олгодог 250,000 хүртэлх долларын тэтгэлэгт хамрагдах боломжийг судалж үзээгүйд шүүмжлэлтэй хандаж байна.
Энэхүү хэрэг явдлын дараа Цагдаагийн комиссар Дэн Дэвисон нутгийн иргэдийн айдас түгшүүрийг ойлгож буйгаа илэрхийлж, эргүүлийн тоог яаралтай нэмэгдүүлнэ гэж мэдэгдэв. Тэрээр нийгмийн дунд хүчирхийлэл үйлдэхийг ямар ч тохиолдолд хүлээн зөвшөөрөхгүй бөгөөд энэ удаагийн халдлагыг тусгаарлагдсан хэрэг гэж үзэж байгаа ч иргэдийн аюулгүй байдлыг баталгаажуулах үүднээс хяналтаа чангатгахаа амлалаа.
