Казахстаны Ерөнхийлөгч Касым-Жомарт Токаев Бельгийн Хаан Филиппийн хамт Астана хотноо дээд хэмжээний хэлэлцээ хийж, хоёр талын хамтарсан мэдэгдэлд гарын үсэг зурлаа. Бельгийн хааны хос аравдугаар сарын 11-нээс 14-ний өдрүүдэд тус улсад төрийн айлчлал хийсэн бөгөөд талууд үүнийг харилцааны түүхэн чухал үйл явдал гэж дүгнэв. Хоёр орны төрийн тэргүүн нар Каспийн тэнгис дамнасан олон улсын тээврийн чиглэл буюу 'Дунд коридор'-ыг хөгжүүлж, Ази болон Европыг холбосон тогтвортой сүлжээг бэхжүүлэхээ мэдэгдлээ.
Удирдагчид эдийн засгийн тогтвортой хөгжил, өрсөлдөх чадварыг нэмэгдүүлэхэд цахим шилжилт, хиймэл оюун болон инновацын салбар тэргүүлэх үүрэгтэйг онцлов. Тэд их өгөгдөл, үүлэн технологи, супер компьютерын дэд бүтэц болон дата төвийн чиглэлээр түншлэлээ өргөжүүлэх сонирхлоо илэрхийлсэн юм. Ерөнхийлөгч Токаев Казахстан улс цахимжилт, сансрын технологийг хөгжүүлэх эрмэлзэлтэй байгааг тэмдэглэсэн бол Хаан Филипп Казахстаны хиймэл оюуны шийдлүүдийг үнэлж, 'Alem.AI' төвд зочлохоо мэдэгдлээ.
Эдийн засгийн хамтын ажиллагааны хүрээнд чухал ашигт малтмал, нефть хими, машин үйлдвэрлэл, сэргээгдэх эрчим хүчний салбарт харилцаагаа гүнзгийрүүлэхээр тохиролцов. Айлчлалын үеэр стратегийн ач холбогдол бүхий чухал ашигт малтмалын дугуй ширээний уулзалтыг зохион байгуулж, хөдөө аж ахуйн худалдаа болон хүнсний үйлдвэрлэлийг дэмжихээр болов. Бельги улс 2005 оноос хойш Казахстаны эдийн засагт 15 тэрбум гаруй ам.долларын хөрөнгө оруулсан бөгөөд энэ нь хоёр талын түншлэлийн гол тулгуур болж байна.
Түүнчлэн талууд Казахстан болон Европын Холбоо, түүний гишүүн орнуудын хооронд 2015 оны 12 дугаар сарын 21-ний өдөр байгуулсан Өргөтгөсөн түншлэл, хамтын ажиллагааны хэлэлцээрийн зарчмуудад үнэнч хэвээр байгаагаа бататгалаа. Айлчлалын үеэр хоёр орны Бизнесийн зөвлөлийн дөрөв дэх хуралдаан амжилттай болж, хувийн хэвшлийн хэлхээ холбоог бэхжүүлэх боломжийг олгосныг удирдагчид сайшаав. Боловсролын салбарт их сургуулиудын ректоруудын чуулга уулзалтыг зохион байгуулж, эрдэм шинжилгээний хамтарсан хөтөлбөр хэрэгжүүлэхээр тохирлоо.
Эрүүл мэндийн чиглэлээр Дэлхийн эрүүл мэндийн байгууллага (ДЭМБ)-ын анхан шатны тусламж үйлчилгээний эвслийн хүрээнд хамтын ажиллагааг гүнзгийрүүлэхээр болов. Талууд 1978 оны Алма-Атагийн тунхаглал болон 2018 оны Астанагийн тунхаглалын зарчмуудыг баримталж, Алматы хотод болох олон улсын бага хурлын санаачилгуудыг дэмжихээ илэрхийллээ. Соёлын хүрээнд Бельгийн зураач Жэймс Энсорын үзэсгэлэнг Казахстаны Үндэсний музейд дэлгэж, Алматы хотын Урлагийн музей 'KANAL-Center Pompidou'-тай хамтран ажиллахаар болжээ.
Уулзалтын үеэр албаны паспорт эзэмшигчдийг визийн шаардлагаас чөлөөлөх тухай Казахстан болон Бенилюксийн орнуудын хэлэлцээрийн нэмэлт протокол хүчин төгөлдөр болсныг сайшаав. Мөн 2027 онд тохиох дипломат харилцааны 35 жилийн ойг угтан дипломат ажилтнуудын гэр бүлийн гишүүдийг хөдөлмөр эрхлүүлэх тухай хэлэлцээг эцэслэн батлахаар тохиролцлоо. Түүнчлэн 1972 оны 4 дүгээр сарын 10-ны өдөр баталсан Бактериологийн болон хорт зэвсгийг хориглох тухай конвенцын хэрэгжилтийг бэхжүүлэхийн чухлыг хамтарсан мэдэгдэлд онцлон тэмдэглэв.
Хоёр орны удирдагчид олон улсын тавцан дахь олон талт үзэл, НҮБ-ын манлайлал болон олон улсын эрх зүйн хэм хэмжээг тууштай дэмжихээ дахин нотлов. Талууд НҮБ, ЕАБХАБ болон 'Казахстан-ЕХ', 'Төв Ази-ЕХ' зэрэг олон талт форматын хүрээнд улс төрийн яриа хэлэлцээг идэвхжүүлэхээр санал нэгдлээ. Ерөнхийлөгч Токаев болон Хаан Филипп нар энэхүү анхны төрийн айлчлал нь хоёр улсын найрсаг харилцааг чанарын шинэ түвшинд гаргана гэдэгт бүрэн итгэлтэй байгаагаа илэрхийлэв.
