Арнхем Лэнд бүс нутгийн Элхо арлаас гаралтай, бүртгэлтэй сувилагч Йиварр Макграт энэ долоо хоногт Австралийн Умард бүс нутгийн (NT) хууль тогтоох байгууллагад албан ёсоор тангараг өргөлөө. Өдгөө 35 настай тэрбээр Мулка тойрогт болсон нөхөн сонгуульд Хөдөлмөрийн намаас нэр дэвшин ялалт байгуулж, уугуул ёлну иргэдийн дуу хоолой болохоор парламентын гишүүний танхимд орж ирж байна.
Түүний төлөөлөн суух Мулка тойрог нь Арнхем Лэндийн Йирркала, Галивинку, Милингимби, Рамингининг зэрэг уугуул омгийн суурингууд болон уул уурхайн томоохон хот Нулунбуйг хамардаг өргөн уудам газар нутаг юм. Уг суудлыг 2016 оноос хойш 10 орчим жил хашсан бие даагч, ёлну омгийн ахмад зүтгэлтэн Йиния Гуюла энэ онд албан тушаалаасаа огцорсны дараа тус нөхөн сонгуулийг зарлажээ.
Бага насандаа өнчирсөн Макгратын амьдрал ядуурал, бэрхшээл дунд өнгөрсөн байна. Түүнийг таван настай байхад эцэг нь квадроциклийн ослоор амиа алдсан бол арав хүрэхэд нь эх нь хэрэх өвчний хүндрэлээр хорвоог орхижээ. Хамаатан садныхаа дунд алслагдсан отрууд дамжин өссөн тэрбээр боловсрол эзэмшсэнийхээ ачаар амьдралаа өөрчилж чадсан хэмээн дурссан юм. Тэрбээр 16 настайдаа сантехникийн туслахаар ажиллаж, дараа нь уугуул иргэдийн эрүүл мэндийн ажилтнаар долоон жил зүтгэсэн бөгөөд улмаар ёлну омгоос төрсөн анхны мэргэшсэн сувилагч болсон түүхтэй.
Гурван охины өрх толгойлсон эцэг Макграт улс төрийн тавцанд гарах гол хөшүүрэг нь хүүхдүүдийнх нь ирээдүй байсан гэдгийг онцоллоо. Түүний том охин Дэстини аавыгаа уугуул залуусаас Арнхем Лэндийг төлөөлөн дуугарч буй цорын ганц шинэ үеийн төлөөлөл хэмээн бахархан ярьсан бөгөөд нутгийн олон түмнийг шинэ замаар чиглүүлнэ гэдэгт итгэж буйгаа илэрхийлэв.
Эрүүл мэндийн анхан шатны тусламжийн салбарт ажиллах явцдаа Макграт нийгмийн ядуурал, орон сууцны хомсдол иргэдийн амьдралд хэрхэн нөлөөлдгийг нүдээрээ харжээ. Тэрбээр Умард бүс нутгийн эрх баригч Хөдөөгийн Либерал намын бодлогыг шүүмжилж, ялангуяа Дарвин хот дахь уугуул иргэдийн богино хугацааны байрлах төвийг хааж, иргэдийг хотоос 100 километрийн зайд нүүлгэн шилжүүлж буй явдлыг хүний эрхийг ухраасан хэрэг хэмээн эсэргүүцсэн байна.
Шинэхэн гишүүн танхимын хамтрагчдадаа болон нийгэмд ядуурлын үндсэн шалтгааныг тайлбарлан таниулахаа илэрхийллээ. Өнгөрсөн үеийн шаналлыг давтан ярих бус, залуу үеийн боловсрол, эрх чөлөөг тэлэх шинэ эрин үеийг эхлүүлж, ард түмнийхээ язгуур эрх ашгийн төлөө тууштай тэмцэхээ тэрбээр онцлов.
