АНУ-ын Миссури мужийн Канзас хотод Куба гаралтай Андрес Гарсиаг хууль бусаар санал өгсөн хэргээр баривчилсан тухай АНУ-ын Өрнөд Миссурийн Дүүргийн Прокурорын Газар мэдэгдлээ. Энэхүү мөрдөн байцаалтад АНУ-ын Иргэншил, Цагаачлалын Алба (USCIS) тусалсан байна.
64 настай Гарсиаг 2022 оны арваннэгдүгээр сар болон 2024 оны арваннэгдүгээр сард холбооны сонгуульд хууль бусаар санал өгсөн хоёр хэрэгт буруутгажээ. Тэрээр Кубад төрсөн бөгөөд бага насандаа АНУ руу цагаачилж, 2009 онд хууль ёсны байнгын оршин суугчийн статустай болсон юм.
Гарсиа хууль ёсны байнгын оршин суугч болохоосоо өмнө буюу 2004 онд Миссури мужийн Касс Каунтид сонгогчоор бүртгүүлжээ. Тэрээр сүүлийн 20 жилийн хугацаанд дор хаяж 15 сонгуульд, үүнээс 13 нь холбооны сонгуульд тогтмол санал өгсөн байна. АНУ-ын хуулиар хууль ёсны байнгын оршин суугчид холбооны, муж улсын болон орон нутгийн сонгуульд санал өгөх эрхгүй байдаг. Гарсиа өөрийгөө АНУ-ын иргэн биш гэдгийг мэдэж байсан ч 2004, 2013 онуудад сонгогчоор бүртгүүлэхдээ иргэн гэж мэдүүлсэн аж.
Энэ хэргийг АНУ-ын Өрнөд Миссурийн Дүүргийн Прокурорын Газар хянан шалгаж байгаа бөгөөд Дотоодын Аюулгүй Байдлын Мөрдөн Байцаах Газар (Homeland Security Investigations) USCIS-ийн тусламжтайгаар мөрдөн байцаалтыг явуулжээ. Холбооны хуулиар Гарсиаг хэрэг тус бүрт нэг жил хүртэлх хугацаагаар хорих, 100,000 ам.долларын торгууль ногдуулах боломжтой юм. Шүүх зөвлөмж болгосон ялын удирдамж болон бусад хуулийн хүчин зүйлсийг үндэслэн ялыг тогтооно.
